Einn af hverjum fimm at­vinnu­mönnum notar nikótínpúða

Notkun nikótínpúða er alls ekki nýtt fyrirbæri og hefur tíðkast hjá knattspyrnumönnum lengi. Arnar Þór Viðarsson, atvinnumaður til fjölda ára og fyrrum landsliðsþjálfari, sagði að á sínum dögum sem leikmaður í Belgíu hafi jafnvel verið algengara að menn notuðu nikótínpúða heldur en ekki.

Vinsældir þeirra hafa breiðst út og verið til umræðu í Bretlandi undanfarin ár. Á síðasta ári ákváðu leikmannasamtökin svo að hrinda af stað rannsókn til að vekja athygli á neikvæðum áhrifum og aukaverkunum púðanna. Niðurstöður hennar liggja nú fyrir.

• 51 kona og 628 karlmenn tóku þátt.
• 18 prósent karla og 22 prósent kvenna sem tóku þátt í rannsókninni nota nikótínpúða. 
• 42 prósent karla og 39 prósent kvenna játuðu fyrir að hafa prófað slíka púða áður.
• Leikmenn segjast aðallega nota nikótínpúða í félagslegum aðstæðum, til að slaka á með liðsfélögum eftir æfingar og til að losa um spennu eftir leiki.
• Hátt hlutfall þeirra sem nota púðana sýndu ummerki fíknar, eða 58 prósent karla og 86 prósent kvenna. 
• Svipað hlutfall segist aldrei hafa fengið fræðslu um skaðsemi eða aukaverkanir púðanna.

„Þetta er mikilvæg rannsókn sem mun hjálpa leikmönnum, þjálfurum og læknateymum félaganna að taka upplýsta ákvörðun um notkun nikótíns. Við erum meðvituð um aukna notkun nikótínpúða í búningsherbergjum þvert yfir landið en hingað til hafði notkun þeirra í atvinnufótbolta aldrei verið rannsökuð.

Þessar niðurstöður leiða í ljós að þó æ fleiri notist við nikótínpúða til að höndla síaukið álag séu margir ómeðvitaðir um hversu skaðlegir og ávanabindandi þeir eru,“ segir Dr. Michael Bennett, framkvæmdastjóri hjá leikmannasamtökunum.