Einn glæsi­legasti golf­völlur landsins í Kiðja­bergi

Það sem aðgreinir Kiðjabergsvöll frá mörgum golfvöllum er hið mikla útsýni sem kylfingar njóta meðan á hring stendur. Golfvöllurinn liggur að hluta til meðfram Hvítá og Hestvatni sem er ávallt gaman að líta til á meðan leik stendur. Hægt er að sjá Ingólfsfjall úr fjarska og síðan er Hestfjall handan við hornið. Það er alveg hægt að gleyma sér í náttúrufegurðinni. 

Golfklúbburinn er einnig með stærsta flota af golfbílum til leigu en mörgum finnst þægilegra að keyra völlinn heldur en að ganga.

Glæsilegt 250 metra æfingasvæði er í Kiðjabergi sem allir, óháð golfhæfileikum geta nýtt sér. Einnig eru tvær æfingaflatir til að æfa púttin, vippin og glompuhöggin. Ennfremur er æfingavöllur sem hægt er að spila að endurgjaldslausu.

Öll flóra kylfinga sækir völlinn heim. Meðlimir eru mjög duglegir að spila völlinn og einnig gestir, bæðir innlendir og erlendir. Golfvöllurinn hefur ávallt verið vel sóttur af utanaðkomandi kylfingum. Ennfremur er Kiðjabergsvöllur mjög vinsæll meðal fyrirtækja sem vilja halda boðsmót en völlurinn er talinn frábær skemmtun og aðstaða til fyrirmyndar. Flott klúbbhús með búningsklefum og glæsilegri veitingasölu að nafni Kaffi Kið þar sem Rakel, vertinn á staðnum, getur töfrað hvaða rétt sem er.

Það hefur einnig verið mjög mikil aukning meðal erlendra ferðamanna sem er ánægjulegt. Gaman að heyra þeirra upplifun af Kiðjabergsvelli sem er undantekningarlaust alltaf jákvæð og sýnir sig í fjölda bókana bæði hjá erlendum golfferðaskrifstofum og á eigin vegum.