McLaren vill að Verstappen verði refsað: Allur heimurinn veit hver er sá seki

Norris varð að hætta keppni undir lok kappakstursins eftir að Verstappen keyrði á hann í mikilli baráttu um sigurinn. Þetta hafði mikil áhrif á báða því Norris var úr leik og Verstappen missti af sæti á verðlaunapallinum.

Verstappen þarf reyndar ekki að hafa miklar áhyggjur í keppninni um heimsmeistaratitilinn enda með yfirburðarforystu.

Norris hefur samt verið að ógna yfirburðum Verstappen í síðustu keppnum og það var mikil stríð á milli þeirra í brautinni í gær. Norris og Verstappen börðumst um forystuna í tólf hringi þar sem Norris reyndi hvað eftir annað komast fram úr.

Þeir rákust á endanum saman á 64. hring af 71. Bíll Norris var mun meira skemmdur og óökufær en Verstappen náði að klára fimmti.

Verstappen fékk tíu sekúndna refsingu vegna atviksins en það breytti þó ekki neinu um sætaröðina hjá honum.

Andrea Stella, yfirmaður McLaren, hvetur FIA til að refsa Max Verstappen frekar vegna árekstursins og hversu glannalega hann kemst upp með að keyra í keppnum. Guardian segir frá.

„Allur heimurinn veit hver er sá seki. Reglunum var ekki fylgt. Það hefði verið nóg að gefa Max viðvörun, svart og hvítt flagg, ekki gera þetta aftur. Þetta mál ætti að vera tækifæri til að herða tökin og fylgja betur þeim reglum sem eru í gildi,“ sagði Andrea Stella.

Norris sjálfur sakaði Verstappen um að keyra gáleysislega og af örvæntingu.

Stella rifjaði líka upp keppnina á milli Lewis Hamilton og Verstappen árið 2021 þegar þeim lenti ítrekað saman.

„Við viljum ekki sjá annað 2021 mál. Það var ekki gott fyrir F1, var kannski skemmtun en ekki af góðri ástæðu. Ef þú tekur ekki á þessu í byrjun keppninnar þá finnst mönnum þetta óréttlátt og þá fara menn að ganga of langt,“ sagði Stella.