Ríkis­stjórn ekki verið ó­vin­sælli frá tíð Geirs Haarde

Ýmis tíðindi fylgdu þessari nýjustu könnun Gallúp. Fylgi Samfylkingarinnar minnkar mest, Vinstri græn mælast enn úti af þingi og Miðflokkurinn hlyti 14,5 prósenta fylgi og hefur aldrei mælst stærri. 

Ríkisstjórnarflokkarnir eiga það hins vegar allir sameiginlegt að mælast með fylgi sem er mun lægra en það sem þeir fengu í síðustu alþingiskosningum árið 2021. 

Vinstri græn mælast með 4 prósent, Framsókn með 6,9 prósent og Sjálfstæðisflokkur 18,5. 

Í frétt RÚV, þar sem greint er frá niðurstöðum þjóðarpúlsins, kemur fram að stuðningur við ríkisstjórnina sé tæplega 28 prósent. Í janúar á þessu ári mældist stuðningurinn 30,7 prósent.

Fara þarf alla leið til ársins 2009 til þess að finna ríkisstjórn sem mældist með minni stuðning. Það var ríkisstjórn Sjálfstæðisflokks og Samfylkingar undir stjórn Geirs H. Haarde, sem féll skömmu eftir hrun. Ríkisstjórn Samfylkingar og Vinstri grænna mældist minnst með 28,4 prósent stuðning árið í mars árið 2012.

Ýmislegt hefur gengið á hjá núverandi ríkisstjórn sem hefur verið við völd frá árinu 2017. Tekist hefur verið á um hin ýmsu mál innan hennar, svo sem útlendingamál og hvalveiðar. Rýrnandi stuðningurinn sást auk þess vel í útreið Katrínar Jakobsdóttur fyrrverandi forsætirsáðherra í forsetakosningunum í júní. Hún hefur alla jafna verið með mikið persónufylgi en hlaut rétt rúmlega 25 prósenta fylgi í kosningunum.