Ten Hag styður Rashford eftir klúðrin gegn City

Eftir frábært tímabil 2022-23 fann Rashford ekki fjölina sína á síðasta tímabili og var ekki valinn í EM-hóp Englands.

Hann var í byrjunarliði United gegn Manchester City í leiknum um Samfélagsskjöldinn í gær og fékk tvö upplögð færi. Í því fyrra skaut hann langt framhjá og í því seinna setti hann boltann í stöngina. City vann leikinn eftir vítakeppni.

Þrátt fyrir klúðrin í leiknum í gær stendur Ten Hag þétt við bakið á Rashford og er ekki á því að hann skorti sjálfstraust.

„Nei, hann komst nokkrum sinnum í góðar stöður og ég er mjög ánægður með að hann gerði það. Hann verður að halda áfram, halda áfram að koma sér í stöðurnar og þá mun hann skora mörk. Hann er nógu reyndur til að takast á við þetta. Þegar hann skorar eitt munu mörkin koma,“ sagði Ten Hag.

United mætir Fulham í upphafsleik ensku úrvalsdeildarinnar á föstudaginn. United endaði í 8. sæti deildarinnar á síðasta tímabili en vann ensku bikarkeppnina.