Shaw meiddur enn á ný

Man United gaf út yfirlýsingu þess efnis fyrr í kvöld þar sem segir að Shaw sé meiddur á kálfa og verði ekki klár fyrr en eftir landsleikjahléið í september.

Shaw var meira og minna meiddur allt síðasta tímabil. Hann spilaði síðast í febrúar en var samt valinn í landsliðshóp Englands á EM sem fram fór í sumar. Gareth Southgate hafði þá trú að Shaw gæti orðið leikfær í útsláttarkeppninni, sem hann svo var.

Nú er hins vegar ljóst að það verður enn lengra í að þessi 29 ára gamli bakvörður klæðist treyju Man United þar sem hann er meiddur enn á ný.

Meiðslin eru þau 26. á ferli hans hjá Man United en hann fótbrotnaði illa á sínu fyrsta tímabili hjá Man Utd og hefur átt erfitt með að halda sér heilum síðan þá.

Man United mætir Fulham í fyrstu umferð ensku úrvalsdeildarinnar á föstudaginn kemur og verður forvitnilegt að sjá hver leysir vinstri bakvörðinn þar sem Tyrell Malacia, hinn vinstri bakvörður liðsins, er einnig meiddur.