Kominn með nóg af „tuðandi“ Sjálf­stæðis­mönnum

Einar Þorsteinsson, borgarstjóri Reykjavíkur, ræddi nýjan samgöngusáttmála í Bítinu á Bylgjunni á morgun og gefur lítið fyrir mótbárur Sjálfstæðismanna á borð við Vilhjálm Árnason og Jón Gunnarsson en Vilhjálmur hefur gagnrýnt sáttmálann og meðal annars fullyrt að kostnaður við sáttmálann hafi tvöfaldast og að Alþingi þurfi að skoða málin betur.

„Ég átta mig ekki á því hvort þeir eru í sama stjórnmálaflokki og bæjarstjórarnir á höfuðborgarsvæðinu sem stýra Hafnarfirði, Kópavogi, Garðabæ og Seltjarnarnesi sem allir eru Sjálfstæðismenn og styðja þennan samgöngusáttmála. Skilja þá sýn sem verið er að reyna að ná fram hér og er sameiginleg á höfuðborgarsvæðinu öllu og formaður Sjálfstæðisflokksins hefur barist fyrir líka. Ég held að það séu ekki til kjörnir fulltrúar í landinu sem hafa barist jafnhart gegn hagsmunum þeirra sem þeir eiga að þjóna,“ segir hann.

Bílum fjölgað um 15 þúsund

Hann segir niðurstöðuna einfalda. Greiningaraðilar hafi sýnt fram á það að fjölbreyttar leiðir skili mestum árangri og að tilætlaðar framkvæmdir á stofnvegum og borgarlínu komi til með að draga úr umferðartöfum og greiða fyrir flæði umferðar.

„Bara frá 2019 hefur íbúum hér á höfuðborgarsvæðinu fjölgað um ríflega 20 þúsund, bílunum hefur fjölgað um ríflega 15 þúsund. Sem eru 68 bílar sem bættust við umferðina á viku. Þessir sömu aðilar kvarta yfir því að það sé ekkert gert í umferðarmálunum og þá er verið að reyna að leysa úr þessu,“ segir Einar.

Mesti ávinningurinn sé fólginn í því að fá sem flesta úr einkabílum og í almenningssamgöngur. Það stytti ferðatímann bæði hjá þeim sem ferðast á bíl og í strætó.

Einar segir gagnrýnisraddirnar hlægilegar.

„Þessir menn lögðu það til um daginn að það yrði eitthvað neðanjarðarhraðbrautarkerfi undir öllu höfuðborgarsvæðinu. Það var þeirra sýn um daginn. Sem var margfalt dýrara, margfalt óskilvirkara og algjörlega galin hugmynd. Gott og vel að halda það að það sé sannfærandi að þeir hendi sér á vagninn núna og segi svona tuðandi: „Já, ég styð þetta svosem.“ Þegar búið er að berja þá til hlýðni inni í þingflokki Sjálfstæðisflokksins. Það er bara hlægilegt,“ segir Einar.

„Eins og menn voru á móti litasjónvarpinu“

Sjálfstæðismenn í meirihlutum sveitarstjórna höfuðborgarsvæðisins styðji allir á eitt nýja samgönguáætlun og segir Einar að hún svari áköllum almennings um betra og hraðvirkara samgöngukerfi í borginni.

„Það er óskiljanlegt að þessir menn skuli vera stanslaust að hjakkast í þessu,“ segir hann.

„Fólk áttar sig á því hvað þarf að gera hérna. Auðvitað þarf að byggja upp almenningssamgöngur sem skutla fólki á milli staða. Þetta þarf að vera aðgengilegt og auðvelt að nota. Fyrsti kostur fyrir marga. Auðvitað þarf að ráðast á stofnvegina þar sem þeir eru í einhverri stíflu. Ég held að þetta sé góður dagur fyrir okkur öll. Ég vona að Sjálfstæðismenn, Vilhjálmur og Jón Gunnarsson, jafni sig á þessu. Sagan mun dæma baráttu þeirra gegn umferðarbótum á höfuðborgarsvæðinu eins og menn voru á móti Leifsstöð og litasjónvarpinu,“ segir Einar Þorsteinsson borgarstjóri.