Allir leik­menn til sölu

Franska stórblaðið L'Équipe slær því upp að allir leikmenn Lyon séu til sölu en Aftonbladet skrifar um þetta.

Franska félagið þarf að selja leikmenn fyrir fimmtán milljarða í íslenskum krónum en einnig að skera niður launakostnað.

Ástandið ætti að gefa öðrum félögum tækifæri til að fá sterka leikmenn á hálfgerðu útsöluverði því Lyon er sagt vera í engri stöðu til að bíða eftir betra tilboði.

Lyon er sjöfaldur franskur meistari en byrjaði síðustu leiktíð skelfilega. Félagið keypti leikmenn fyrir 134 milljónir evra en varð samt ekki mikið betra. Liðið endaði að lokum í sjötta sæti.

Það eru rekstrarreglurnar sem eru að þrengja að Lyon enda hefur slakt gengi og mun minni Evrópupeningar gert reksturinn mun erfiðari. Há laun og mikil eyðsla í leikmenn er að koma í bakið á félaginu.

Lyon seldi miðvörðinn Jake O'Brien til Everton fyrir 19,5 milljónir evra í sumar og miðjumanninn Skelly Alvero til Werder Bremen fyrir 4,75 milljónir evra. Þetta er ekki nóg.

Hinn tvítugi Rayan Cherki ætti að fá áhuga frá félögum en hann hefur verið orðaður við Borussia Dortmund, Fulham og RB Leipzig. Það þarf hins vegar miklu meira til.

Lyon er búið að spila einn leik á tímabilinu og tapaði þá 3-0 fyrir Rennes.