„Nýr þjálfari, sama gamla sagan“

„Það virðist sem írska landsliðið hafi algjörlega gleymt því hvernig á að vinna fótboltaleiki,“ segir í umfjöllun Gavin Cummiskey á Irish Times.

„Það er sama gamla sagan fyrir nýjan írskan þjálfara í keppnisleikjum þar sem þjálfaratíð Heimis Hallgrímssonar hefst á tveimur gríðarlega þunglyndislegum töpum,“ bætir hann við.

Heimir hóf þjálfaratíð sína á tveimur heimaleikjum í Þjóðadeildinni en báðir töpuðust 2-0, annars vegar gegn Englandi á laugardag, og hins vegar gegn Grikkjum í gær.

Misstu tökin eftir hlé

Cummiskey segir í umfjöllun sinni þó vera bjarta punkta sem hægt sé að byggja á. Írar hafi spilað nýtt kerfi, 3-5-1-1, og hafi verið nokkuð öflugir framan af leik. Liðið hafi spilað fínan fótbolta en ekki haft neitt upp úr krafsinu.

Skallamark Fotis Ioannidis veitti Grikkjum forystu strax í byrjun síðari hálfleiks. Spilamennskan versnaði hjá leikmönnum Heimis eftir það og ógnuðu Írar hvað helst úr föstum leikatriðum.

Tilraunir til að ógna með löngum innköstum voru til einskis þar sem köst Dara O'Shea komust aldrei lengra en á fremsta varnarmann Grikkja. Írar hafa engan Aron Einar Gunnarsson til að fleygja knettinum inn á teiginn og töluvert er síðan Rory Delap hætti.

Aviva-völlurinn í Dyflinn tæmdist þá snögglega eftir að Christos Tzolis innsiglaði 2-0 sigur Grikkja undir lokin í kjölfar mistaka Alans Browne.

Þeir sem ekki gengu á dyr og sátu eftir á vellinum til loka leiks bauluðu hressilega á írska liðið sem er án stiga eftir tvo leiki.

Treyjan of þung

Heimir sat fyrir svörum eftir leik gærkvöldsins og kallar eftir því að leikmenn í írska liðinu stigi upp. Menn sýni ekki sömu gæði í grænu treyjunni og þeir geri með félagsliðum sínum.

Þegar sem best gekk hjá íslenska landsliðinu virtist oft engu máli skipta hvar strákarnir okkar spiluðu. Eða hvort þeir væru að spila reglulega yfirhöfuð. Alltaf smullu hlutirnir þegar í landsliðsverkefni var komið.

„Manni líður eins og treyjan sé kannski aðeins of þung fyrir vissa leikmenn. Þegar þeir spila fyrir okkur sýna þeir ekki sömu gæði og þeir gera hjá félögum sínum. Við þurfum að breyta því,“ sagði Heimir á blaðamannafundi eftir leik og bætti við:

„Ég hef sagt það áður að sjálfstraust kemur með þekkingu á liðsfélögum. Menn þurfa að vita að ef þeir gera eitthvað, að liðsfélaginn sé tilbúinn að hjálpa til og bakka upp. Menn skortir tengingu sín á milli.“

Erfið staða í riðlinum

„Grískur harmleikur“ segja einhverjir í írskum fjölmiðlum og fallið niður í C-deild hangir yfir liðinu segja aðrir. Ljóst er að Írar þurfa að byggja á góðum fyrri hálfleik og rýna í hvað varð þess valdandi að þeir misstu tökin á miðsvæðinu eftir hléið.

Verkefnið verður ekki einfaldara fyrir Heimi og félaga þar sem heimsóknir til Helsinki og Aþenu bíða í október áður en haldið verður á Wembley í Lundúnum í nóvember.