Þóra vonar að Tinna finni sér annað lið: „Kæmi mér á ó­vart ef það yrði ekki slegist um hana“

„Nú er þetta tvítugur markvörður sko, ekki sautján eða átján ára, er hún að hugsa sér að spila í Lengjudeildinni á næsta ári?“ spurði þáttastjórnandinn Helena Ólafsdóttir.

„Ég vona ekki,“ svaraði Þóra Helgadóttir, sem veit eitt og annað um markvörslu.

„Þessi stelpa á að stefna á landsliðið og á að fara í efri hlutann í efstu deild, finnst mér,“ bætti Þóra við en hún er landsleikjahæsti markmaður í sögu kvennalandsliðsins.

Hún spilaði með Breiðablik og KR hér á landi áður en haldið var út fyrir landsteinana, ferlinum lauk svo í Árbænum hjá Fylki. Hún sparar ekki kollega sínum hrósið.

„Hefur alla burði, hún er frábær í fótunum, hún er hávaxin og góður íþróttamaður. Það kæmi mér á óvart ef það yrði ekki slegist um hana.“

Umræðuna um Tinnu Brá úr Bestu mörkunum má sjá í spilaranum hér fyrir ofan.