„Okkar að stöðva drauma þeirra í fæðingu“

Arnar hefur stýrt Víkingum fjórum sinnum til sigurs í bikarkeppninni og fær tækifæri til að vinna fimmta bikarmeistaratitilinn í röð í dag.

„Þetta er alveg magnaður dagur. Sem betur fer höfum við notið hans, nánast frá morgni til kvölds, þessi fjögur skipti sem við höfum verið hérna. Þannig vonandi heldur það bara áfram,“ sagði Arnar í samtali við Val Pál Eiríksson á blaðamannafundi fyrir bikarúrslitaleikinn.

Hádegismatur með starfsliðinu og nagaðar neglur

Arnar segir undirbúninginn fyrir leikinn í dag svipaðan og fyrir hina bikarúrslitaleikina.

„Við höfum spilað marga leiki í sumar og tekið einn leik fyrir í einu. Loksins eftir leikinn á móti Fylki á mánudaginn fór öll einbeitingin á KA, svo er blaðamannafundur núna og á leikdegi fer ég með starfsliðið mitt í hádegismat. Við reynum að njóta dagsins frá morgni til kvölds. Þetta er svona dagur, sumir komast bara einu sinni í hann. Þetta er magnaður dagur þannig þú þarft að gera mjög vel úr honum,“ sagði Arnar.

„Svo nagar maður neglurnar þangað til leikurinn byrjar, með tilheyrandi stressi, sem er gott, þannig að þetta er einstakur dagur.“

Fáranlegar tölur

Víkingur hefur unnið alla bikarmeistaratitlana sem í boði hafa verið frá 2019 og geta orðið fyrsta liðið síðan KR í árdaga keppninnar til að vinna hana fimm sinnum í röð.

„Í þessari blessuðu íþrótt er svo erfitt að komast í úrslitaleik og vera nálægt því að vinna titil þannig að þetta eru forréttindi og tölurnar okkar í bikarnum síðustu fimm ár eru fáránlegar ef maður spáir í þessu,“ sagði Arnar.

„Maður verður auðmjúkur og við erum minnugir þess að njóta þess og ekki vera þjakaðir af einhverju stressi um að þú verðir ekki goðsögn ef þú vinnur ekki fimm ár í röð. Gleyma einhverju svoleiðis kjaftæði og hafa gömlu góðu möntruna í hausnum á þér, að kýla á þetta og svo sjáum við hvað setur.“

Alltaf erfiðir leikir gegn KA

Annað árið í röð mætast Víkingur og KA í bikarúrslitaleiknum. Í fyrra unnu Víkingar 3-1 sigur.

„Frá því ég tók við Víkingi 2019 erum við búnir að eiga margar rimmur við KA og allar hafa verið nákvæmlega eins. Virkilega erfiðir leikir. Þeir eru grimmir og með mjög góða leikmenn og góðan þjálfara [Hallgrím Jónasson] sem hefur náð, eftir erfiða byrjun, að snúa blaðinu við sem er mjög erfitt,“ sagði Arnar.

„Gulrótin fyrir þá að vera í neðri hlutanum, er Evrópukeppni, að vinna og auðvitað mæta þeir dýrvitlausir til leiks. Það er ekkert flóknara en það en svo er þetta bikarúrslitaleikur; það myndu öll lið mæta dýrvitlaus til leiks. Það er okkar að stöðva drauma þeirra í fæðingu.“

Fiðringur og stress en ekki kvíði

Arnar viðurkennir að það sé léttara yfir Víkingum núna en fyrir nokkrum vikum. Hann hefur samt skynjað mikinn spenning fyrir leiknum stóra á æfingum í aðdraganda hans. 

„Það er alltaf fiðringur og þannig á það líka að vera. Þegar þessi fiðringur fer úr kroppnum áttu að snúa þér að einhverju öðru og hætta þessu. Sem betur fer er þetta fiðringur sem fer stress en má alls ekki fara í kvíða því þá fer illa. Hlutverk okkar starfsliðsins er að halda jafnvæginu þarna á milli,“ sagði Arnar.

„Ég er mjög bjartsýnn. Þetta var stíft í sumar. Við vorum þjakaðir af allri þessari pressu, að verða íkon og goðsagnir, vinna allt og ekkert, komast áfram og gera þetta og hitt. Núna finn ég að ánægjan, gleðin og gamla góða Víkingsflæðið er komið aftur.“

Leikur Víkings og KA hefst klukkan 16:00 og verður í beinni textalýsingu á Vísi.

Viðtalið við Arnar má sjá í spilaranum hér fyrir ofan.