Mark­varslan Alis­son í blóð borin

Segja má að markvarsla sé fjölskylduáhugamál en eldri bróðirinn Muriel hóf feril sinn sem markvörður hjá Internacional. Átti það eftir að hafa mikil áhrif á Alisson. Móðir þeirra, Magali Lino de Souza Becker, lék lengi vel sem handboltamarkvörður. Faðir þeirra bræðra heitinn, Jose Agostinho Becker, var markvörður fyrir vinnustað sinn og langafi þeirra var markvörður fyrir áhugamannalið á árum áður.

Þrátt fyrir allt þetta reyndi Muriel að tala Alisson til og koma í veg fyrir að yngri bróðirinn yrði markvörður. Alisson lét ekki til segjast og sér ekki eftir því í dag. Hann var til viðtals í þættinum Football Focus. Ræddi hann þar við Joe Hart, fyrrverandi markvörð Manchester City, Celtic og enska landsliðsins.

„Bróðir minn vissi hversu erfitt það er að vera markvörður og hann sagði mér að spila sem framherji eða annars staðar á vellinum því það væri of mikil þjáning fólgin í því að vera markvörður.“

Alisson sagðist hafa reynt fyrir sér á miðri miðjunni en það hafi aðeins tekið eina æfingu að sjá að það væri ekki fyrir hann.

„Ég naut þess að horfa á Muriel milli stanganna. Sjá hann skutla sér og verja boltann. Ég valdi að gera það sama og ég elska að vera markvörður.“

Hvað fyrirmyndir varða sem eru ekki bundnar honum fjölskylduböndum þá sagðist Alisson horfa upp til samlanda síns Claudio Taffarel, ítölsku goðsagnarinnar Gianluigi Buffon sem og þýska risans Manuel Neuer sem er enn að spila með Bayern München. Alisson til mikillar gleði hóf Taffarel störf hjá Liverpool árið 2021.

„Ég vill æfa vel og mikið ,hann veit það. Við eigum í góðu vinasambandi og það lætur okkur leggja enn harðar að okkur. Hann hjálpar mér mikið og við skiljum hvorn annan. hann er fyrirmynd sem persónu og ég tel mig heppinn að hafa hann í mínu horni.“

Titlar ekki helsta hvatningin

Hinn 31 árs gamli Alisson hóf ferilinn hjá Internacional, fór þaðan til Roma á Ítalíu og svo til Liverpool árið 2018.

Hann hefur unnið Meistaradeild Evrópu, ensku úrvalsdeildina, ensku bikarkeppnina, HM félagsliða og enska deildarbikarinn. Hann er trúaður og þakkar trúarlegu uppeldi sínu sem og vinnusiðfræði árangur sinn á vellinum.

„Mín helsta hvatning eru ekki titlarnir, hvatning mín kemur að innan. Trú mín lætur mig leggja hart að mér. Ég vil vera sá besti í því sem ég geri því ég trúi að allt sem trúi sé hrós til Guðs. Að vinna titla og verðlaun gerir mig glaðan en hvatning mín kemur að innan og frá fjölskyldu minni.“

Í lokin á viðtalinu kemur fram að Arne Slot vilji hafa Alisson meira í æfingum með liðinu svo hann sé betri í að spila út. Það er eitthvað sem Brasilíumaðurinn er ánægður með.

„Hann er klár þjálfari og hefur hjálpað okkur mikið. Þú sérð hvernig við erum að spila nú. Við erum með gott leikplan og erum að fara í rétta átt.“

Að endingu sagðist Alisson vera 100 prósent skuldbundinn Liverpool en hann var orðaður við Sádi-Arabíu í sumar og þá keypti Liverpool nýjan markvörð. Ef til vill þarf sá að bíða lengur eftir að taka við sem aðalmarkvörður þar sem Alisson virðist ekki vera að fara neitt.