Magnaður sigur City á Barcelona og Sæ­dís mætti Juventus

Barcelona hefur verið sterkasta liðið í kvennaboltanum síðustu misserin en liðið hefur unnið sigur í Meistaradeildinni þrjú af síðustu fjórum tímabilum.

Í kvöld mætti liðið Manchester City á Englandi og þar var það enska liðið sem vann frábæran sigur. Naomi Layzell og Khadija Shaw skoruðu mörkin í 2-0 sigri enska liðsins en lið Hammarby vann sigur á St. Pölten í þessum sama riðli fyrr í dag.

Í Noregi tóku Noregsmeistarar Vålerenga á móti ítalska liðinu Juventus á heimavelli sínum. Sædís Rún Heiðarsdóttir var í byrjunarliði Vålerenga og lék allan leikinn vinstra megin á miðjunni.

Sofia Cantore var hetja Juventus í leiknum en hún skoraði eina mark leiksins á 29. mínútu og tryggði Juventus 1-0 sigur.