Rekinn vegna gruns um nýtt brot gegn barni

Da Silva hafði verið leikmaður færeyska félagsins KÍ frá Klaksvík í þrjú ár en hefur nú verið rekinn vegna málsins. Félagið segir í yfirlýsingu að Da Silva sé grunaður um ýmis kynferðisbrot en brotin munu hafa átt sér stað í Danmörku.

Samkvæmt færeyskum miðlum er Da Silva, sem er þrítugur, meðal annars sakaður um tilraunir til að lokka stúlku undir 15 ára aldri til samræðis og gæti hann átt yfir höfði sér allt að fjögurra ára fangelsisdóm.

Da Silva hefur áður verið dæmdur í tuttugu daga skilorðsbundið fangelsi vegna brots gegn stúlku undir lögaldri, en það mál varð til þess að danska félagið Lyngby rak hann í október 2020.

Hann viðurkenndi í viðtali við Ekstra Bladet að hafa sent 14 ára stúlku myndir á Snapchat og Instagram en hélt því fram að stúlkan hefði sagst vera eldri. Samkvæmt dómnum hafði stúlkan þó ítrekað gefið raunverulegan aldur sinn til kynna.

„Þegar um er að ræða börn, eins og hana, þá þá er þetta eitthvað sem maður gerir ekki. Því er ég algjörlega sammála. Ég gerði nokkuð sem ég hefði alls ekki átt að gera. Og ég er svekktastur út í sjálfan mig yfir því að þetta skyldi ganga svona langt,“ sagði Da Silva í viðtali í nóvember 2021.

Mánuði síðar ákvað færeyska félagið KÍ að gefa honum nýtt tækifæri og hann hefur nú spilað þrjú tímabil með liðinu, alls 63 deildarleiki, en spilar ekki aftur fyrir liðið.