Rauðvínsgljáður sviðakjammi og mysuglassúr á kleinu

„Hressó er elsta bistró Reykjavíkur, stofnað á tímum áfengisbannsins og enginn staður kemst með tærnar þar sem Hressó hefur hælana í sögunni. Hver einasta kynslóð hefur ólíkar tengingar við þennan stað,“ segir Heiðrún Mjöll Jóhannesdóttir, vínsérfræðingur og framkvæmdastjóri Hressó.

„Hingað kemur fólk sem komið er yfir nírætt og vill fá kaffi og köku og segir sögur af Steini Steinarr, ungt fólk með krassandi djammsögur frá því þegar það skreið hér inn um brotna gluggana. Um tíma var McDonalds hérna svo sushistaður, pítsastaður, aftur kaffihús um tíma og nú erum við mætt með aðaláherslu á íslenskan mat,“ segir Heiðrún.

Ekki bara fyrir túrista

Einvala lið stendur á bak við Hressó ásamt Heiðrúnu en eigendur eru Bragi Skaftason sem einnig er eigandi Vínstúkunnar Tíu Sopar, Brút og Krónikunnar og Gústi Bakari sem stofnaði Brauð og Co og er eigandi BakaBaka. Þá hrærir einn fremsti matreiðslumaður landsins í pottunum í eldhúsinu.

„Andreas yfirkokkur var í námi á Dill, fór svo á Monkeys og þaðan á Vínstúkuna þar sem hann kom sá og sigraði. Það lá beint við að fá hann hingað með okkur á Hressó þegar við fórum að leita að kokki,” útskýrir Heiðrún. Hún blæs á að áhersla á íslenskan mat kalli eingöngu á erlenda ferðamenn, Íslendingar séu vanafastir á mat „eins og amma eldaði hann“ en á Hressó er þó búið að setja smá tvist á aðferðir ömmu.

Sviðakjamminn kemur skemmtilega á óvart

„Við viljum fá Íslendinga til okkar og bjóðum upp á íslenskan mat sem við erum búin að lyfta aðeins upp. Við erum samt ekkert að flækja hlutina og vinsælasti rétturinn okkar er til dæmis plokkfiskur í sinni hreinustu mynd, fiskur og kartöflur stappað með smjöri. Ýsa í raspi og kótilettur í raspi eru líka mjög vinsælar og svo kemur sviðakjamminn, sem við sjóðum ekki heldur ofnbökum með rauðvínsgljáa og stöppum kartöflur með en ekki rófur, mjög ánægjulega á óvart. Þessi íslenski matur er orkuríkur og hefur komið þjóðinni gegnum kalda vetur. Hressó er engin túristagildra,“ segir Heiðrún sposk.

„Sviðakjamminn er mesta sportið hjá útlendingunum og kemur reyndar Íslendingunum líka skemmtilega á óvart. Svo erum við mikið fyrir að fólk deili mat og bjóðum upp á pönnur til að deila, annars vegar pönnu með þorski í smjörsósu og fennel og hins vegar laxi með gulrótum og kartöflum. Mælum með að fólk deili líka vínflösku og sitji við gluggann við kertaljós og fylgist með mannlífinu í Austurstræti meðan það borðar saman,“ segir Heiðrún. En hvað með eftirrétt?

„Eitt sem við höfum fengið mikið hrós fyrir er kleinan á eftirréttaseðlinum en hún er með mysuglassúr! Það gæti hljómað illa í eyrum þeirra sem hafa verið busaðir en í mysu eru mjólkurprótein sem verða einfaldlega að sykri þegar þau eru soðin niður, hin besta karamella,” segir Heiðrún.

Flækir ekki vínlistann

Allur drykkjalistinn er einfaldur og aðgengilegur, hvítt, rautt og freyðivín, þrjár tegundir af hverju. Þó er smá tvist á drykkjunum líka, til að mynda er gin og tónik borið fram með sölum! Heiðrún sem er annálaður vínspekúlant og þekkt fyrir að tala um vín á mannamáli sérvaldi vínin á Hressó.

„Fólk miklar þetta oft fyrir sér en þetta þarf ekkert að vera flókið. Ég kem frá Port 9 þar sem allt snerist um vín en á Hressó gat ég leyft mér að einfalda hlutina miklu meira. Ég valdi vel inn á vínlistann og öll vínin okkar passa með hinum og þessum réttum svo það er ekkert flókið að panta,“ segir Heiðrún.

Jólin komin í gang

Jólaseðillinn á Hressó verður með nokkrum sígildum jólaréttum og einnig smá smörrebrödsívafi.

„Við verðum klassík eins og hangikjöt og pursteik á jólalistanum en einnig með léttari valkosti eins og lúðu með Beurre Blanc og kalkún með brúnum kartöflum. Við settum einnig kraft í að þróa forréttina og það sem kom mér sérstaklega á óvart voru smjörsteiktu nípurnar. Svo gátum við ekki séð fyrir okkur að halda jólin án þess að halda í hangikjötskróketturnar,“ segir Heiðrún. 

Þá verður dönsk smörrebrödsstemmning í hádeginu. „Hádegin hjá okkur verða hlaðinn þeirri snilld sem smörrebröd er. Við ætlum ekkert að finna upp hjólið þar en það verða tvö grænmetis-smörre í boði, kartöflusalat annars vegar og rauðrófusalat hinsvegar. Og svo allt það sem við höfum lært að elska á smörrebröd, roast beef, rækjur og reyktur lax en samtals eru átta tegundir að velja úr. Við verðum með tilboð á þremur smörre á 8.590 krónur milli klukkan 11-15 alla daga.“