McIlroy kemur „úr felum“ eftir ó­venju­legar æfingabúðir

Golfáhugafólk mun hins vegar sjá mögulega breytingu á leikstíl McIlroy á þessu móti. Hann er að koma úr felum eftir þriggja vikna æfingarbúðir þar sem hann vann í nýrri golfsveiflu hjá sér.

McIlroy sagði að hann hafi verið fastur í golfhermum þessar vikur og unnið í sveiflunni sinni, fyrst á Flórída og svo í New York. Hann eyddi dögunum í það að slá boltanum í skjá með nýju sveiflunni sinni. ESPN segir frá.

McIlroy hefur ekki verið ánægður með sveifluna sína en hann var líka mjög ósáttur við það að hafa kastað marg oft frá sér góðri stöðu á mótum á þessu ári.

Besta dæmið um það var Opna bandaríska meistaramótið í júní þar sem hann klúðraði tveimur stuttum púttum á síðustu þremur holunum. Hann hefur ekki unnið risamót í heilan áratug.

„Eina leiðin fyrir mig til að breyta sveiflunni, eða í það minnsta að komast í rétta átt með sveifluna mína, var að læsa mig inni og hætta að horfa á það hvert boltinn færi. Bara einbeita mér að réttu hreyfingunum,“ sagði Rory McIlroy á blaðamannafundi fyrir mótið.

„Ég reyndi að gera sveifluna markvissari og þá er ólíklegra að hún riðlist þegar pressan er mikil. Ef ég horfi á þetta ár þá er það eina sem ég get fundið að er að ég klúðraði þremur tækifærum til að vinna mót,“ sagði McIlroy.

Takist McIlroy að vinna í Abú Dabí þá verða úrslitin ráðin fyrir lokamótið.

„Ef ég fer út og vinn í þessari viku, þá verður þetta kannski svolítið leiðinlegt í næstu viku. Það verður samt ekki leiðinlegt fyrir mig, heldur bara yndislegt,“ sagði McIlroy sposkur.

„Ég er evrópskur kylfingur. Ég vil tryggja stöðu mína sem besti evrópski kylfingur sögunnar,“ sagði McIlroy en tók það fram að hann sé hvergi nærri hættur og stefnir á frekari titla í framtíðinni.