KA sótti sigur á Ísa­fjörð og Stjarnan þurfti fram­lengingu

KA mætti Herði á Ísafirði nú í kvöld en Hörður féll úr Olís-deildinni eftir síðustu leiktíð. Heimamenn í Herði byrjuðu betur, voru með frumkvæðið í fyrri hálfleik og leiddu 18-16 í hálfleik.

Þeir komust síðan þremur mörkum yfir í upphafi síðari hálfleiksins en þá tóku KA-menn við sér. Þeir náðu 9-2 áhlaupi og breyttu stöðunni úr 19-16 yfir í 25-21 sér í vil. Herði tókst að minnka muninn í eitt mark undir lokin en komust ekki lengra og KA fagnaði 30-27 sigri og fara því áfram í 8-liða úrslit.

Einar Birgir Stefánsson var markahæstur hjá KA með sex mörk og Patrekur Stefánsson skoraði fimm. Hjá Herði var Endijs Kusners markahæstur með sjö mörk. 

Í Garðabænum tók Stjarnan á móti Fjölni. Stjarnan komst í 6-2 í upphafi leiks og hélt forystunni út fyrri hálfleikinn. Staðan að honum loknum 15-12. Í síðari hálfleik náðu Fjölnismenn í nokkur skipti að minnka muninn í eitt mark en voru í erfiðleikum með að taka skrfið og jafna metin.

Í stöðunni 30-29 töpuðu Stjörnumenn boltanum og Fjölnismenn geystust upp og jöfnuðu metin í 30-30 rétt áður en lokaflautið gall. Því þurfti að framlengja leikinn. Þar voru Stjörnumenn sterkari. Þeir skoruðu fimm fyrstu mörkin og bjuggu til mun sem Fjölnismenn náðu ekki að brúa.

Lokatölur 39-33 og Stjarnan tryggir sér þar með sæti í 8-liða úrslitum en Fjölnir er úr leik. Starri Friðriksson var markahæstur hjá Stjörnunni með sex mörk líkt og Pétur Árni Hauksson. Hjá Fjölni skoraði Björgvin Páll Ríkharðsson tíu mörk og Brynjar Óli Kristjánsson kom næstur með sjö mörk.

Fyrr í dag tryggðu Haukar og ÍR sér sæti í 8-liða úrslitum með sigrum á ÍBV og Þór frá Akureyri.