Al­freð hættur: „Takk fyrir allt sem þú hefur gefið mér og minni fjöl­skyldu“

Alfreð, sem er 35 ára gamall, tilkynnti í ágúst að hann væri hættur að spila fyrir íslenska landsliðið.

Hans síðasti leikur á ferlinum var með belgíska liðinu Eupen í ágúst en síðan þá hefur hann verið án félags, og óvissa ríkt um framhaldið.

Í færslu á Instagram í dag skrifar Alfreð hins vegar stutt kveðjubréf til fótboltans.

„Kæri fótbolti. Takk fyrir allt sem þú hefur gefið mér og minni fjölskyldu. Þessi fimm ára strákur átti sér einn draum. Ég var nógu heppinn að fá að upplifa hann á hverjum degi, og svo mikið meira. Bless.“

Alfreð er uppalinn í Grindavík en bjó einnig í Skotlandi í tvö ár og æfði svo einnig með yngri flokkum Fjölnis og Breiðabliks. Hann hóf svo meistaraflokksferil sinn með Breiðabliki, þar sem hann sló í gegn sumarið 2009 og skoraði þrettán mörk í efstu deild, í aðeins átján leikjum, og hlaut bronsskóinn.

Markið gegn Argentínu og mörkin sem komu Íslandi á HM

Þessi mikli markahrókur var þar með kominn á kortið og átti eftir að raða inn mörkum víða um Evrópu. Hann náði sérstaklega miklu flugi sem framherji Heerenveen í Hollandi, þar sem hann gerði heil 53 mörk í 65 leikjum í efstu deild, og hjá Augsburg í Þýskalandi, þar sem hann dvaldi lengst eða sex ár, en lék einnig í Belgíu, á Spáni og í Danmörku.

Fyrir Ísland skoraði hann átján mörk í 73 A-landsleikjum og það eftirminnilegasta í hugum flestra er eflaust markið gegn Argentínu 2018, það fyrsta sem Ísland skoraði á heimsmeistaramóti. 

Hann skoraði einnig þrjú dýrmæt mörk á leið Íslands á sitt fyrsta HM, í leikjum við Úkraínu, Finnland og Tyrkland í undankeppninni.

Tæknilegur rágjafi Breiðabliks

Ljóst er að Alfreð verður áfram við störf í knattspyrnuheiminum en í byrjun ágúst var tilkynnt að hann hefði verið ráðinn sem tæknilegur ráðgjafi knattspyrnudeildar Breiðabliks, félagsins sem hann fagnaði bæði Íslands- og bikarmeistaratitli með á sínum tíma.

Alfreð sagði þegar ráðningin var tilkynnt að fótboltaferill sinn yrði áfram í forgangi en nú er ljóst að hann spilar ekki fleiri leiki.

„Þegar Breiðablik leitaði til mín varðandi það að hjálpa þeim að móta stefnu næstu ára ásamt því að vera þeirra ráðgjafi varðandi fótbolta tengdar ákvarðanir, þá þurfti ég ekki að hugsa mig lengi um. Við áttum góð samtöl og vorum sammála um að á meðan margt er í mjög góðum farvegi hjá Breiðablik, þá eru atriði sem hægt er að gera betur í sameiningu með rétta teyminu. Mikilvægast er að Breiðablik haldi áfram því frábæra starfi sem það er þekkt fyrir síðustu 15 árin, sem er að spila góðan og árangursríkan fótbolta, ásamt þvi að gefa ungum leikmönnum tækifæri eins og hefðin hefur verið. Minn fótboltaferill mun áfram vera mitt forgangsatriði ásamt því núna að vera Breiðablik til halds og traust þegar það á við,“ sagði Alfreð í ágúst.