Sjöunda og stærsta Icebox-kvöldið: „Klikkað að sjá að Ís­land geti þetta“

Icebox hefur fest sig í sessi sem íþróttaviðburður hér á landi og hann er alltaf að verða stærri. Sjö bardagar eru á dagskránni í kvöld auk tónlistaratriða.

Bardagar kvöldsins

„Algjörri sprengju,“ sagði Davíð Rúnar Bjarnason, skipuleggjandi Icebox, í samtali við Vísi, aðspurður við hverju áhorfendur megi búast í kvöld.

„Það er alltaf skemmtilegast að vera á staðnum en útsendingin síðast var alveg sturluð þannig það má búast við því sama aftur. Þetta verður veisla. Bardagarnir eru mjög skemmtilegir og tónlistaratriðin risastór.“

Að sögn Davíðs verður Icebox í kvöld það stærsta til þessa.

„Ég fór upp í hámarksáhorfendafjölda síðast og ég er að gera það aftur. Miðasala gengur rosalega vel og það má búast við fjölmenni og enn stærri sýningu. Ég er að gefa svolítið í þegar kemur að sýningunni,“ sagði Davíð en meðal þeirra sem troða upp í Kaplakrika í kvöld eru Floni og Herra hnetusmjör.

Davíð kveðst stoltur af því að Ísland geti haldið hnefaleikaviðburð af þessari stærðargráðu.

„Icebox er áhugamannahnefaleikaviðburður og eftir því sem ég kemst næst, stærsti staki áhugamannahnefaleikaviðburðurinn í Evrópu. Það er ekkert stakt kvöld í Evrópu af þessari stærðargráðu. Það eru kannski rétt tvö þúsund manns á einhverjum kvöldum í Bretlandi en litla Ísland er að fara vel yfir það þannig þetta er virkilega stórt og flott á allan hátt og gaman að eiga þetta og skipuleggja. Það er klikkað að sjá að Ísland geti þetta því það er klárlega áhugi fyrir þessu og hann eykst klárlega með hverjum viðburðinum,“ sagði Davíð.

Hvað bardaga kvöldsins varðar segir Davíð vert að hafa augun á tveimur af stjörnum síðustu bardagakvölda, Eriku Nóttar Einarsdóttur og Elmars Gauta Halldórssonar. Þá ríki mikil spenna fyrir lokabardaga kvöldsins, milli Hafþórs Magnússonar og Ibrahims Kolbeins Jónssonar.

„Þetta eru andlit sem fólk er farið að þekkja. Það er einn kvennabardagi þar sem Erika Nótt mætir Hildi Kristínu. Þær voru liðsfélagar lengi vel og hafa mæst oft en eru að mætast aftur. Í bardaganum sem er þar á eftir er svo Elmar Gauti, sem allir sem fylgjast með boxi þekkja. Hann er í 75 kg flokki en er að keppa á móti strák sem er 86 kg [Gabríel M. Róbertsson]. Það verður áhugavert að sjá,“ sagði Davíð.

„Aðalbardagi kvöldsins er eitthvað sem þeir sem eru í boxinu og þekkja vel til hafa beðið lengi eftir: Hafþór Magnússon á móti Ibrahim Kolbeini. Það verður sprengja,“ bætti Davíð við.

Bein útsending frá Icebox hefst klukkan 19:30 í kvöld á Stöð 2 Sport.