Ekki allir sam­mála um magn jóla­skreytinga eða lita­val

Hildur Ýr fór yfir málið í Reykjavík síðdegis á Bylgjunni í dag. Hún segir fólk mega skreyta eins og því lystir en það gildi ekki alveg það sama um séreignir og fjölbýli. Grein um sama efni birtist einnig á Vísi fyrr í dag.

„Ef við tölum um sérbýlin má maður skreyta eins mikið og maður vill á meðan það skemmir ekki friðhelgi einkalífs nágrannana,“ segir Hildur. Séu ljósin til dæmis mjög björt, blikkandi og þeim fylgi hávaði geti það haft áhrifa.

„Við höfum fengið kvartanir hjá fólki sem hefur kvartað yfir mikilli umferð til að skoða ljós hjá nágrönnunum. Það sé verið að troðast í garða til að sjá betur.“

Hún segir að yfirleitt leysist deilumálin í janúar þegar ljósin eru tekin niður.

„Flestir umbera þetta þó þeir séu ekki sammála litsamsetningunni hjá nágrannanaum. Þá þolir fólk þetta í einhvern tíma. Það er ekkert verið að reyna á þetta fyrir kærunefnd eða dómstólum, þetta leysist yfirleitt, og kannski tekur því ekki. En það er alltaf eitthvað um þetta.“

Skiptar skoðanir á reglum í fjölbýlishúsa

Hún segir ágreiningsmál til dæmis hafa komið upp á húsfundum fjölbýlishúsa. Húsfélög geti sett reglur um skreytingar og það geti verið mjög skiptar skoðanir á þeim.

„Það er meirihluti sem ræður, nema ef þetta á að vera gríðarlega ýkt með miklum ljósum og hávaða, þá þyrfti samþykki allra, en í grunninn þá er þetta meirihlutaákvörðun sem allir þurfa að hlíta.“

Hildur segir að þau hafi fengið til sín húseiganda sem hafi sem dæmi verið mótfallin slíkum reglum en það hafi ekki náð lengra en það.

Hildur segir húsfélög ekki geta sett reglur um það hvernig fólk skreytir inni en það geti sett samræmdar reglur um skreytingar utan á húsinu.

„Það eru margir sammála því að það sé fallegra að allir séu með eins í blokkinni en að allir séu með sitt á hvað. Þá verður maður að hlíta því þó maður sé ekki sammála því sem meirihlutinn ákveður.“

Hitamál á húsfundi

Hildur segir til dæmis framkvæmdastjóra húseigendafélagsins hafa verið að stýra húsfundi og þegar kom að síðasta liði fundarins, um jólaskreytingar, hafi allt farið í háaloft.

„Það tók 40 mínútur að afgreiða þennan dagskrárlið,“ segir Hildur og að fólk á fundinum hafi verið mjög ósammála um hvernig og hversu mikið ætti að skreyta húsið.

„En yfirleitt nær fólk saman eða þolir þetta ef það er ósammála og lætur þar við sitja.“

Líka kvartað yfir skötulyktinni

Hildur segir að í desember sé einnig algengt að kvartað sé undan skötulykt og hávaða.

„Það er enn skemmri tími sem fólk þarf að þola það, en við höfum oft fengið það inn á borð húseigendafélagsins,“ segir Hildur og að það sé mögulega efni í aðra grein.

Það sé samt alltaf sama stef. Fólk megi gera í sinni eign allt sem trufli ekki aðra verulega í öðrum eignum.

„Að láta skötulykt ilma í fjöleignarhúsinu í marga daga. Það eru skiptar skoðanir á því hvert þarna sé íbúðareigandi að ganga nærri friðhelgi einkalífs annarra í blokkinni með því að elda skötu hjá sér.“