„Gaman að heyra hann öskra á bak­við mann“

Afturelding fékk til sín Íslandsmeistarann Oliver Sigurjónsson og Þórð Gunnar Hafþórsson frá Fylki, og bræðurna Jökul og Axel Óskar sem nú sameinast á ný hjá uppeldisfélagi sínu, eftir að hafa farið þaðan ungir til Reading á Englandi. Þeir eru sammála um að þrátt fyrir önnur tilboð, meðal annars frá Bandaríkjunum, hafi í raun ekkert annað komið til greina en að spila saman með Aftureldingu:

„Þetta er léttasta ákvörðun í heimi, þegar klúbburinn sem maður deyr fyrir er kominn upp í Bestu deildina. Jökull var hérna síðasta tímabil og ég mætti á hvern einasta leik og sá hverja einustu mínútu. Maður hefur gert það síðan maður fór út. Maggi [Magnús Már Einarsson, þjálfari] er líka helvíti góður í að selja manni verkefnið, og það þurfti ekkert að selja manni þetta því þetta er ógeðslega flott verkefni. Við erum mjög spenntir,“ segir Axel.

Ala upp ungar dætur í heimabænum

Bræðurnir segja auk þess henta vel að dvelja á Íslandi næsta árið, Jökull með þriggja mánaða dóttur og Axel með dóttur sem er aðeins ári eldri.

„Maður er búinn að vera lengi úti, og tók svo eitt ár í KR, og það voru möguleikar úti, vestanhafs. En þetta var of spennandi til að sleppa því. Sérstaklega út af því að bróðir minn er hérna líka. Að bræðurnir komi aftur saman hérna, á fyrsta ári Aftureldingar í efstu deild, var of gott til að vera satt,“ segir Axel og Jökull tekur í sama streng, eftir að hafa varið mark Aftureldingar seinni hluta síðustu leiktíðar.

„Mig langaði rosalega til að vera hérna í heilt tímabil á Íslandi. Ég er líka kominn með dóttur hérna, búinn að vera tíu ár á Englandi og mikið einn, og mig langaði aðeins í þetta fjölskyldulíf og toppa það með því að fara í fjölskylduklúbbinn. Það var eiginlega ekkert annað í boði þegar maður fattaði að ég og brósi gátum spilað saman hérna.

Við erum búnir að fá inn tvo aðra geggjaða leikmenn. Ég sagði það þegar við komumst upp að við værum ekkert að grínast hérna. Við ætlum ekkert bara að vera með – að sjálfsögðu viljum við vinna þessa deild og komast í Evrópusæti og slíkt. Þetta er sturlað og ég gæti ekki verið meira spenntur,“ segir Jökull, en eins og fyrr segir er Afturelding nú í fyrsta sinn með lið í efstu deild karla í fótbolta.

 „Erum ekkert að fara úr þessari deild“

„Núna erum við komnir og við erum ekkert að fara úr þessari deild. Ég held að við munum koma mjög mörgum á óvart á þessu tímabili með því sem við getum gert. Við erum með okkar plan, okkar fótbolta, og núna búnir að styrkja hópinn. Ég held að við komum gríðarlega sterkir inn í næsta tímabil,“ segir Jökull, sem er 23 ára gamall.

„Það er mikið pepp í kringum klúbbinn. Að sjálfsögðu virðum við deildina eins og hún er – hrikalega sterk. Öll liðin í deildinni eru að styrkja sig og þetta er ekki létt vinna. En ég trúi að með komu okkar munum við standa okkur vel í þessari deild,“ bætir hinn 26 ára gamli Axel við og alveg augljóst hvor er eldri bróðirinn - varfærnari í tali.

„Hann er stóri bróðir þannig að maður er létt að skíta í sig“

Jökull er markvörður og Axel miðvörður, og því ljóst að bræðurnir munu vinna náið saman næstu misserin. Þeir eru fyrst og fremst afar spenntir fyrir því en…:

„Hann er stóri bróðir minn þannig að maður er létt að skíta í sig líka, og hlustar kannski aðeins of mikið á hvað hann segir. En við erum bestu vinir, höfum alltaf verið það, og ég held að þetta muni ganga ótrúlega vel, þó það geti oft verið smá kýtingur. Ég held að þetta verði ótrúlega gaman,“ segir Jökull.

„Ég held að það verði bara gaman að heyra hann öskra á bakvið mann, þó maður verði kannski ekki alltaf sammála. Maður verður bara að hlusta, hann er stjórnandinn fyrir aftan mann,“ bætir Axel við og Jökull er gíraður í það:

„Ég er að fara að öskra á þá!“