„Hef mínar pælingar sem mér finnst gaman að taka á­fram“

Starfið markar fyrsta skref Arnórs eftir farsælan feril sem at­vinnu- og lands­liðs­maður. Þegar Valur leitaði til hans þurfti Arnór ekki að hugsa sig tvisvar um.

„Þetta hefur alltaf blundað í mér. Að fara þessa leið,“ segir Arnór. „Ég hef náttúru­lega gríðar­legan áhuga á fót­bolta og er með reynslu úr knatt­spyrnu­heiminum. Hef mínar pælingar sem mér finnst gaman að taka áfram. Ég held að þetta sé spennandi starf og gott starf fyrir mig til þess að taka mín fyrstu skref eftir knatt­spyrnu­ferilinn.

Forráða­menn knatt­spyrnu­deildar félagsins höfðu sam­band við mig og við tókum góða fundi. Mér leist strax mjög vel á þetta. Það eru rosa­legir mögu­leikar í boði hérna hjá Val. Hverfið hér í kring er að stækka mjög hratt og iðk­enda­fjöldi í yngri flokkunum í takt við það, bæði hjá strákum og stelpu. Ég sé mikil tækifæri þar. Það er gaman að koma inn í þetta. Móta þessa stefnu fyrir yngri flokkana þannig að þessir krakkar sem eru í Val fái bestu mögu­legu þjálfun og utan­um­hald. Ég er gríðar­lega spenntur fyrir því að sjá hvað framtíðin ber í skauti sér. Ég tel bjarta tíma fram­u hjá Val.“

Hlúa að ungviðinu

Líkt og Arnór segir fer Vals­fjöl­skyldan stækkandi með stækkun hverfisins í kringum höfuðstöðvar félagsins og aðstaðan er að byggjast upp jafnt og þétt. Hlúa á að grunninum, ung­viðinu, en í gegnum tíðina hefur verið bent á það hversu fáir upp­aldir leik­menn hafa verið að spila fyrir meistara­flokka Vals.

„Eins og þú segir rétti­lega hefur það ekki gengið sem skyldi síðustu ára­tugi. Það eru breyttir tímar. Við erum að fara mikið í aðstöðumál á næstunni. Það er að koma nýr æfingar­völlur og svo á næstu árum á að rísa hér knatt­hús sem mun styrkja inn­viði félagsins gríðar­lega í sam­bandi við iðk­enda­fjöldann. Ég tel að við getum boðið þessu krökkum topp aðstöðu hjá topp félagi og að klár­lega á næstu árum og ára­tugum verði fleiri upp­aldir Vals­menn í liðunum. Það er spennandi verk­efni að takast á við.“

Munu breyta innkaupastefnunni

En Valur er félag sem sækir alltaf í átt að titlum og var síðasta tíma­bil ákveðin von­brigði þar sem að hvorki kvenna- né karla­liðinu tókst að vinna Ís­lands­meistara­titil en konurnar urðu þó bikar­meistarar.

„Valur er metnaðar­fullt félag sem vill berjast á öllum vígstöðum. Ef við lítum til baka nokkur ár aftur í tímann þá hafa hóparnir verið sam­settir með sigur strax (e. win now) stefnu. Að sjálfsögðu munum við vera með sam­keppnis­hæf lið en munum kannski breyta okkar inn­kaupa­stefnu ör­lítið. Flýta okkur hægt, leita að réttum leik­mönnum sem eru aðeins yngri, metnaðar­fullir og vilja koma í Val.“

„Það verður lykilinn að þeim leik­mönnum, bæði karla- og kvenna megin, sem við munum líta í. Valur er stórt félag á Ís­landi sem vill alltaf berjast á toppnum. Við munum halda því áfram og munum nota bæði þessa öflugu flokka sem eru að koma upp, halda vel utan um þá. Koma þeim upp í meistara­flokk með tíð og tíma og með því finna réttu leik­mennina í góðri blöndu. Þannig að hópurinn sé vel sam­settur af hungruðum leik­mönnum í bland við gæði.“

Gylfi Þór klárlega partur af því

Það dylst engum að gæða­mikla leik­menn er að finna bæði í röðum kvenna­liðs Vals sem og karla­liðsins. Gylfi Þór Sigurðs­son, einn besti fót­bolta­maður Ís­lands frá upp­hafi, er þeirra á meðal en greint hefur verið frá því að á milli tíma­bila hafi kaup­til­boði í hann verið hafnað.

Verður Gylfi Þór Sigurðs­son leik­maður Vals á næsta tíma­bili?

„Gylfi er samnings­bundinn Val. Al­gjör topp drengur og leik­maður. Að sjálfsögðu viljum við hafa Gylfa Þór Sigurðs­son með okkur og viljum byggja gott lið sem er sam­keppnis­hæft. Gylfi Þór er klár­lega partur af því.“

„Átti hérna mjög góða tíma“

Það er ákveðin rómantík fólgin í því að Skagamaðurinn Arnór Smára­son sé nú mættur til Vals. Því þó svo að ekkert toppi Skaga­hjarta hans er því ekki að neita að Vals taugin er sterk í honum.

„Ég var hérna í tvö ár. Endaði minn at­vinnu­manna­feril og byrjað minn feril hér á Ís­landi eftir það með Val. Átti hérna mjög góðan tíma. Þekki fólkið hérna í húsinu sem er mikill plús. Það er frábært fólk sem vinnur hérna hjá Val. Hægt að læra mikið af mörgum. Ég ætla að koma inn með mína jákvæðni og metnað. Taka fót­bolta­legu reynsluna sem ég hef fengið í gegnum minn feril og líta svolítið á þetta með knatt­spyrnu­legum augum. Það mun vera minn fókus.

„Um leið og Valur kom upp eftir að skórnir fóru á hilluna fannst mér það tækifæri sem ég gæti ekki sagt nei við. Ég er mjög metnaðar­fullur sjálfur, lýst vel á það sem menn vilja fara í hérna hjá Val. Vil verða hluti af því og er mjög spenntur fyrir því.“