Erfitt að skikka fólk til að vera til­lits­samt

Nokkur umræða hefur skapast í hópnum Mæðratips á Facebook um tónleika-röð hljómsveitarinnar þar sem einhverjir eru óánægðir með það að börnin þeirra sáu ekki á sviðið vegna þess að svo margir voru með önnur börn á háhest. Hljómsveitin hóf tónleikaröðina í gær klukkan 18 og svo aftur klukkan 21.

„Það var hræðilegt að horfa upp á öll börnin í örvæntingu að vilja sjá strákana á sviðinu en sáu ekkert,“ segir ein móðir í Mæðratips og ítrekar að ekki allir geti sett börnin á háhest. Einhverjir taka undir þetta í athugasemdum á meðan aðrir benda á að tónleikarnir hafi farið vel fram.

Aldrei verið fleiri LED skjáir í Laugardalshöll

„Það er mjög erfitt að bregðast við þessu. Það er auðvitað bent á að þetta hafi verið vandamál í fyrra og við erum búin að bregðast við þessu með því að fara í stærri sal og vera með stærri skjái. En engu að síður hefur þetta verið erfitt fyrir sumar litlar manneskjur sem voru mættar á tónleika að sjá,“ segir Máni í samtali við fréttastofu.

„Uppsetningin á tónleikunum er þannig að allir eigi að geta séð. Ég held það hafi aldrei verið settir jafn margir LED-skjáir í Laugardalshöll og á þessum tónleikum. Það er meira að segja þannig ef þú ferð fram á klósettið geturðu séð tónleikana á skjá frammi svo þú missir ekki af neinu, og átt að heyra tónlistina. Það var alveg hugsað fyrir þessu öllu.“

Hann segir á sama tíma mikinn fjölda á tónleikunum og það hafi líklega verið vandamálið í gær hversu margir settu börnin á háhest. Máni segir erfitt fyrir viðburðahaldara að skipta sér af því hversu tillitssamt fólk er. Það sé gæsla á svæðinu en hennar markmið sé að gæta öryggis og að fólk komist heilt heim.

„Það er auðvitað ekki bannað að setja börnin á háhest, og fyrir sum börn er það alveg frábært að fá að sitja á háhest hjá pabba. En við vonum auðvitað að fólk hafi þetta í huga og gagnrýnin er góð að því leyti að þegar allt of mörg börn eru tekin á háhest fyrir miðju sviði er erfitt fyrir aðra að sjá. Maður vonast þá til þess að fólk hafi það í huga í dag og færi sig til hliðar ef það ætlar að vera með einhvern á háhesti.“

Gagnrýnin veki fólk til umhugsunar

Máni segir þetta á sama tíma þekkt á tónleikum, og hafi verið það í mörg ár.

„Þú getur farið 50 ár aftur í tímann og þú getur séð að þetta hefur verið gert á tónleikum allan tímann. Það hefur einhver hent einhverjum litlum á háhest svo hann sjái betur og það er mjög erfitt að bregðast við þessu. En ég vona að með þessari gagnrýni veki það fólk til umhugsunar um þau sem fyrir aftan eru ef þau taka einhvern á háhest.“

Máni segir það hafa verið skoðað að hafa tónleikana sitjandi en niðurstaðan hafi verið að upplifunin hefði ekki verið sú sama, og í raun ekki sú sem fólk væri að leitast eftir.

„Þetta eru ekki hefðbundnir jólahátíðartónleikar. Þetta eru stuðtónleikar og þú ert með hljómsveit sem er dansandi og hoppandi uppi á sviði og með læti. Fólkið í salnum vill vera með læti. Enda seljast miðarnir í stæðin hraðar en í stúkuna því flestir vilja úti á gólfinu,“ segir Máni.

Auk þess standi þau líka flest sem séu í stúku. Það sé svo mikið stuð.

„Það var svakalegt stuð í gær og ég geri ráð fyrir enn meira stuði í dag. Ég vona að fólk taki tillit til hvers annars.“

25 þúsund miðar seldir og engar kvartanir

Máni segir að í heildina séu um 25 þúsund manns sem sæki tónleikana í dag og í gær. Hann segir tónleikahöldurum ekki hafa borist neinar kvartanir í gær. Það sé leiðinlegt að þetta hafi ekki gengið vel hjá öllum en hann myndi ekki breyta neinu við tónleikana. Það sé pláss fyrir alla og það eigi að vera rúm fyrir alla til að sjá og heyra eitthvað skemmtilegt á tónleikunum í kvöld.

„Það var almenn ánægja í gær. Við fengum engar kvartanir en svo sáum við þetta í dag og það er fínt að geta komið því á framfæri að fólk sýni hvert öðru tillitssemi svo allir geti séð sem mest. Þetta verður frábært stuð og þetta er eintóm gleði,“ segir Máni að lokum.