Mínútu fyrr á ferðinni væri Tómas allur

Tómas ræddi málið við fréttastofu á leið sinni í bátinn Baldur sem fer frá Brjánslæk yfir í Stykkishólm og varð Tómas orðinn ansi seinn vegna snjóflóðsins sem þveraði veginn sem hann þurfti að komast um. Að hans sögn er það mínútu spursmál hvort hann nái bátnum eða hvort hann eyði Þorláksmessu í tjaldi á Vestfjörðum.

„Var eins og blaut steypa“

„Ég var að keyra heiman frá mér. Ég er með annað heimili sjö kílómetrum frá Bíldudal í Hvestudal og er að leggja af stað niður brekkuna hjá mér í mjög þungri ferð, það er búið að kyngja niður snjó síðustu daga. Ég er rétt kominn fyrir neðan Svarthamra sem er klettabelti stutt frá húsinu mínu. Þá heyri ég bara rosalega þungan dynk og ég hélt bara að það hefði losnað snjór af þakinu á bílnum mínum en síðan keyri ég í nokkrar sekúndur í viðbót og þá sé ég bara að það er þessi svaka spýja á veginum sem hafði komið efst úr fjallinu,“ segir Tómas í samtali við Vísi. 

Hann tekur fram að snjóflóðið hafi greinilega fallið niður rétt áður en hann átti leið hjá. Hann hafi oft orðið var við snjóflóð á svæðinu en tekur fram að hann hafi aldrei séð það jafn stórt. 

„Þetta var eins og blaut steypa. Maður fann það hvað þetta var nýlegt þegar maður gekk upp á þetta. Þetta var ópakkað og mjög sérstakt. Ég var handan við klett þegar þetta kom niður en ég var þarna nokkrum sekúndum á eftir. Innan við mínútu seinna og ég hefði lent í flóðinu.“

Frændi kom til bjargar

Tómas kom bílnum og sjálfum sér í var og hafði samband við frænda sinn sem býr á svæðinu.

„Ég hringi í frænda minn sem heitir Jón Bjarnason. Hann er með gröfuþjónustu og fleira í Bíldudal. Ég segi honum að ég sé strandaglópur og þurfi þá að eyða jólunum þarna einn. Hann sagði: Auðvitað get ég hjálpað þér, ég er meira að segja að ryðja annan veg. Ég verð kominn eftir klukkutíma.“

Frændi Tómasar stóð við loforðið og var kominn innan við klukkutíma síðar en það tók hann um hálftíma að ryðja veginn. 

„Ég er núna á leiðinni í Baldur, ég vonast til að ná því. Ég er búinn að hringja í skipstjórann og segja honum frá afdrifum mínum. Þeir sýna því skilning. Það er rosalega þungbært núna á sunnanverðum Vestfjörðum jafnvel á velútbúnum bílum eins og mínum. Ég er bæði á nöglum og 35 tommum. Það er ekkert ferðaveður núna en ég er bara að gera þetta til að geta verið með fjölskyldunni á aðfangadag.“

Þurrmatur í stað skötu

Hann varar aðra við að vera á ferðinni á svæðinu þó að hann hafi komist leiðar sinnar.

„Ég er með jöklatjald og jöklasvefnpoka í bílnum mínum og prímus og allt ef ég skyldi festast. Þegar maður er að keyra hérna á veturna, þarf maður að vera við öllu búinn. Ég er rétt ókominn í Brjánslæk, Baldur fer eftir korter.“

Hvað gerist ef þú missir af honum? 

„Þá er það bara tjaldið og prímusinn. Ég er með svona þurrmat sem er bara helvíti góður.“

Hann er kannski bara skárri en skatan?

„Miklu skárra. Þetta er norskur þurrmatur spahettí bolognese ég gæti alveg hugsað mér það. Þetta er fínasta jólasaga.“