Innlent

Árni Grétar Futuregrapher látinn

Tómas Arnar Þorláksson skrifar
Árni Grétar Jóhannesson, einnig þekktur sem Futuregrapher.
Árni Grétar Jóhannesson, einnig þekktur sem Futuregrapher. Margrét Unnur

Árni Grétar Jóhannesson, einnig þekktur sem Futuregrapher, er látinn 41 árs að aldri eftir að bíll hans hafnaði í sjónum í Reykjavíkurhöfn á gamlársdag. Árni var raftónlistamaður og einn stofnenda plötufyrirtækisins Möller Records.

Ólafur Sveinn Jóhannesson, bróðir Árna, staðfestir andlát bróður síns í samtali við Vísi en hann greindi frá andlátinu á Facebook-síðu sinni í gær. 

„Ástkær bróðir okkar - Árni Grétar Jóhannesson - hefur kvatt þennan heim. Eftir hann liggur aragrúi tónverka, ljósmynda og texta sem lýsa fallegri sál,“ segir í færslu Ólafs. Hægt er kynna sér verk Árna á vefsíðu hans futuregrapher.bandcamp.com.

„Hann hefur spilað víða við góðar undirtektir – m.a. á Iceland Airwaves, Sonar Reykjavík, Aldrei fór ég suður, Extreme Chill og í N-Ameríku og Evrópu. Futuregrapher hefur gefið út tvær breiðskífur: LP og Skynvera, margar smáskífur og gert endurhljóðblandanir fyrir aðila eins og Mick Chillage, Samaris, Ghostigital og Kimono. Árni Grétar starfar einnig í hljómsveitinni Royal ásamt Birni Kristjánssyni (Borko) og með tónlistarmanninum Jóni Ólafssyni (Jón Ólafsson & Futuregrapher),“ segir á vefsíðunni Ísmús, íslenskur músík- og menningararfur, um Árna.

Nærri allt tiltækt slökkvilið á höfuðborgarsvæðinu, auk björgunarkafara, var kallað út eftir að tilkynning barst um að ökutæki hafi hafnað sjónum við Ægisgarð í Reykjavíkurhöfn á öðrum tímanum á gamlársdag. Kafarar slökkviliðsins sóttu Árna úr bílnum skömmu síðar.

Andlát Reykjavík Tónlist

Tengdar fréttir

Sjötíu plötur og mörg hundruð þúsund streymi

Raftónlistarútgáfan Móatún 7 er heldur betur að gera góða hluti um þessar mundir en útgáfan sérhæfir sig í 7-tommu vínylplötum sem eru framleiddar hér á Íslandi. Útgáfurnar eru nú orðnar alls sjötíu talsins og hafa selst í meira en tvö þúsund eintökum en nánast öll eintökin voru send kaupendum erlendis.

World Circuit á toppnum á bandcamp

Desolate Snow Roads er ný plata með dúóinu World Circuit en það eru breski raftónlistarmaðurinn Lee Norris (Metamatics, Norken) og hinn íslenski raflistamaður Árni Grétar (Futuregrapher, Árni²). 

Frumsýning:

Futuregrapher frumsýnir nýtt myndband

Tóku upp plötu í rólegheitum á Grænlandi

Hljómsveitin Stereo Hypnosis og tónlistarmaðurinn Árni Grétar eða Future­grapher skelltu óvænt í plötu í einni töku á Grænlandi fyrr í sumar. Þar voru þeir staddir til að spila á tónlistar­hátíð í bænum Sisimiut en hann er töluvert afskekktur.

Mest lesið


Fleiri fréttir

Sjá meira


×

Mest lesið