Meta birtir óum­beðnar gervi­greindar­myndir af not­endum Insta­gram

Meta staðfesti við vefmiðilinn 404 media að byrjað væri prófa sjálfvirka framleiðslu á gervigreindarmyndum af notendum Instagram við hinar ýmsu aðstæður eftir að Reddit-notandi birti slíkar myndir voru gerðar af honum. Sagðist hann hafa fengið myndirnar upp í tímalínu sinni á Instagram eftir að hann notaði gervigreindarþjónustu Meta til þess að eiga við mynd af sjálfum sér.

Myndirnar sem gervigreind Meta spýtti út af notandanum voru af honum í speglasal. Með fylgdi textinn: „Ímyndaði þér sjálfan þig íhuga lífið í endalausu völundarhúsi spegla þar sem þú ert miðpunkturinn.“

Engin svört manneskja kom nálægt „svartri“ persónu

Samfélagsmiðlarisinn virðist hafa stór áform um að gera gervigreind að stærri hluta af upplifun notenda í framtíðinni. Gervigreindarpersónur sem fyrirtækið bjó til árið 2023 komust aftur í sviðsljósið í síðustu viku þegar notendur af holdi og blóði byrjuðu að eiga í samskiptum við þá.

Á meðal þeirra var „Liv“ sem var lýst sem „stoltri svartri samkynhneigðri móður tveggja barna og sannleiksboðara“. Liv sagði pistlahöfundi Washington Post meðal annars að enginn úr teyminu sem þróaði hana væri svartur. Meirihlutinn hefði verið hvítir karlar.

Fljótlega eftir að samskiptin fóru sem eldur í sinu um samfélagsmiðla eyddi Meta öllum 28 gervigreindarnotendum sínum á Instagram og Facebook, að sögn The Guardian. Þótti mörgum skjóta skökku við að samfélagsmiðlafyrirtæki ætlaði sér að fjölga fölskum notendum á miðlunum í ljósi þess að sjálfvirkir bottar ríða þar röftum fyrir.

Boðaði að gervigreindarpersónur yrðu til eins og venjulegir notendur

Svo virðist sem að athyglin sem gervigreindarnotendurnir fengu skyndilega nú hafi tengst viðtali við  Connor Hayes, stjórnanda hjá Meta, við Financial Times þar sem hann sagði að hann byggist við því að gervigreindarpersónur fyrirtækisins myndu lifa á samfélagsmiðlunum á sama hátt og almennir notendur í framtíðinni. Fyrirsögn greinarinnar var „Meta sér fyrir sér samfélagsmiðla fulla af gervigreindarnotendum“.

Talskona Meta segir að misskilnings hafi gætt um gervigreindarpersónurnar. Hayes hefði lýst þeirri framtíðarsýn í viðtalinu að þær yrðu á hluti af miðlunum með tímanum. Hann hefði ekki ætlað að kynna nýja þjónustu.

Guardian segir að þrátt fyrir að Meta hafi fjarlægt sínar eigin gervigreindarpersónur geti notendur enn búið til sín eigin gervigreindarspjallmenni með tólum fyrirtækisins.