Tveggja marka tap í toppslagnum

Juventus styrkti stöðu sína töluvert með sigrinum, sjö stigum munar nú milli liðanna þegar tvær umferðir eru eftir af venjulegri deildarkeppni.

Cecilía Rán Rúnarsdóttir stóð í marki Inter eins og hún hefur gert í flestöllum leikjum á tímabilinu. Hún átti tvær góðar vörslur í leiknum en kom ekki vörnum við þegar Sofia Cantore skaut á 27. mínútu, eða þremur mínútum síðar þegar Cristiana Girelli skoraði af stuttu færi.

Juventus er nú með 41 stig í efsta sætinu og Inter 34 stig í öðru sætinu. Tvær umferðir eru eftir af venjulegri deildarkeppni. Efstu fimm liðin, og neðstu fimm, leika svo tvöfalda umferð í úrslitakeppninni, svo samtals verða spilaðir 26 leikir og Inter á því enn möguleika á að vinna deildina.