„Gott að koma inn á og fá nokkrar mínútur“

„Við fundum okkur mjög vel í seinni hálfleik bæði varnar- og sóknarlega. Vorum góðir í sókn í fyrri hálfleik en ekki alveg nógu góðir í vörn. Þeir voru að taka stöðuskot á okkur sem að Bjöggi sá seint og náði þá ekki að verja, en í seinni hálfleik fannst mér við stíga vel upp varnarlega. Gerðum það mjög vel,“ sagði Ísak fljótlega eftir leik.

Ísak var í leikmannahópnum í síðasta deildarleik gegn KA, en spilaði ekkert. 

„Þá vorum við bara ennþá að koma mér í stand og ég þurfti ekkert að spila, sem var bara fínt. En flott í dag, gott að koma inn á og fá nokkrar mínútur. Komast hægt og rólega inn í þetta,“ sagði Ísak um meiðslin sem hann er að snúa aftur úr.

Hann reif liðþófa og var frá síðustu fimm leiki en er búinn að jafna sig og segir hnéð núna í „toppmálum.“

Atvinnumennskan í sumar

Það eru ekki einu fréttirnar af Ísaki. Greint var frá því fyrr í dag að Ísak væri á leið út í atvinnumennsku í sumar, til TMS Ringsted í Danmörku.

„Það leggst mjög vel í mig. Skemmtilegt verkefni að fara í gang þar en maður er búinn að setja það undir koddann núna í bili. Einbeitingin er sett á að klára þetta tímabil með Val með stæl. Þetta leggst allt vel í mig.“

„Það þýðir ekkert annað“ en að vera með fullan fókus á toppbaráttuna, sagði Ísak að lokum.