Enginn upp­fyllti skil­yrðin í upp­hafi

Í janúar 2022 varð skráning stjórnmálaflokka  á svokallaðri stjórnmálasamtakaskrá skilyrði fyrir opinberum styrkjum til þeirra. 

Fjármálaráðuneytið greiddi hins vegar slíka styrki til stjórnmálaflokkanna í  janúar 2022 áður en nokkur þeirra hafði  uppfyllt skilyrði um skráninguna í hina svokölluðu stjórnmálasamtakaskrá.

Misfljótir flokkar

Viðreisn og Samfylking, uppfylltu rétta skráningu í febrúar 2022. Framsókn, Sjálfstæðisflokkur og Píratar í apríl 2022.  Miðflokkurinn og Sósíalistaflokkurinn 2023 og Vinstri græn 2024. Þetta kemur fram á vef Stjórnarráðsins. Þá var Flokkur fólksins síðastur til skrá sig rétt eða nú í febrúar.

Fjármálaráðherra ákvað á dögunum að krefjast ekki endurgreiðslu framlaga hjá þeim flokkum sem þáðu slíka styrki án þess að vera með rétta skráningu á þeim tíma og hefur sú ákvörðun verið gagnrýnd af ýmsum. Stjórnskipunar-og eftirlitsnefnd Alþingis hélt opinn fund í dag vegna málsins og var fjármálaráðherra krafinn svara ákvörðun sína.

Fjármálaráðuneytið átti að bíða með útgreiðsluna

Daði Már Kristófersson fjármálaráðherra segir að fjármálaráðuneytið hefði ekki átt að greiða út neina styrki fyrr en flokkarnir voru búnir að uppfylla ný skilyrði laga um skráningu í stjórnmálasamtakaskrá árið 2022.

„Það hefði verið eðlilegt verklag að þessari skráningu væri lokið þegar greiðsla á styrkjum fór fram. Það voru að vísu sérákvæði í lögunum, en það var ekki gert,“ segir Daði.

Aðspurður um hvort flokkarnir hefðu getað skráð sig hvenær sem er árið 2022 til að uppfylla skilyrði laganna, svarar Daði neitandi. 

Nei, verklagið í fjármálaráðuneytinu hefði átt að vera að bíða með hina eiginlegu útgreiðslu þangað til skráning hvers flokks var rétt. Skilyrði laganna voru að þessu leyti alveg skýr.

„Þetta er stórfurðulegt“

Flokkur fólksins uppfyllti ekki skilyrði laganna fyrr en eftir landsfund flokksins í þessum mánuði.

 Guðmundur Ingi Kristinsson formaður þingflokksins segir óskiljanlegt að það hafi ekki gerst fyrr.

„Það þar þarf eiginlega að athuga og rannsaka hvað fór úrskeiðis. Þetta er stórfurðulegt. Þau sem voru við stjórn þarna 2022 gerðu þetta ekki heldur á réttum tíma. Það má halda því fram að lögin hafi klúðrast. Þetta voru smávægileg mistök hjá okkur en við þurfum að vanda okkur betur,“ segir Guðmundur.

Aðspurður um hvort skatturinn hafi komið með ábendingar vegna málsins segir Guðmundur að það hafi ekki verið fyrr en á síðasta ári. 

„Við fengum ekki leiðbeiningar frá skattinum fyrr en eftir að við fengum greidda styrkina í fyrra.  Þá fórum við að reyna að redda þessu. Við fengum þau skilaboð að við þyrftum að halda landsfund áður sem við erum nú búin að halda og þetta er í lagi í dag.“