„Bara gaman þegar fólk er í sjokki yfir okkur“

Hér má sjá viðtalið við tvíburana í heild sinni:

Komu út á sama tíma

Gunnar Skírnir og Sæmundur ólust upp á Akureyri en fluttist til Reykjavíkur á unglingsárunum. Tvíburarnir komu út úr skápnum á sama tíma og vissu báðir að þeir væru samkynhneigðir frá því þeir voru í sjöunda bekk.

„Það var mjög gott þegar við komum út, fengum stuðning frá hvor öðrum og svo var fjölskyldan okkar náttúrulega ótrúlega stuðningsrík.“

Þeir skutust saman upp á stjörnuhimininn í raunveruleikaseríunni Æði og ganga fast í takt við hvorn annan.

„Það voru örlög okkar að fara í Æði og það var ekki bara einn okkar að fara af stað í þetta, það var aldrei í boði,“ segja strákarnir.

Silvía Nótt mikill innblástur

Þeir hafa farið í gegnum hin ýmsu tímabil og minnast þess að hafa ekki þorað að vekja neina athygli á sér sem unglingar, áður en þeir komu út úr skápnum. Í dag fylgja þeir algjörlega sínum stíl og veigra sér ekki við því að rokka glæsilega kjóla og litríkar yfirhafnir.

„Við höfum alltaf elskað poppstjörnur á borð við Nicki Minaj, Beyoncé, Lady Gaga og auðvitað Silvíu nótt. Ég held að þessi tónlistarmyndbönd sem við horfðum stöðugt á hafi reynst okkur mikill innblástur í tískunni,“ segir Gunnar Skírnir.

Strákarnir eru með ólíkan stíl þó að klæðnaður þeirra eigi oft í skemmtilegu samtali. Þeir koma sannarlega báðir til dyranna eins og þeir eru klæddir og láta álit annarra lítið þvælast fyrir sér.

„Alltaf þegar ég fer út í áberandi fötum þá náttúrulega starir fólk á mann en ég er orðinn mjög vanur því,“ segir Gunnar Skírnir og Sæmundur tekur undir.

„Það veldur mér stundum kannski smá kvíða en ég er bara að vera ég sjálfur. Mér finnst það bara nóg. Við erum orðnir svo vanir glápi og sjokki en okkur finnst líka bara gaman þegar fólk er í sjokki yfir okkur,“

segir Gunnar Skírnir og brosir.