Gunnar tekur aftur við Haukum

Á dögunum var greint frá því að Gunnar myndi hætta sem þjálfari Aftureldingar eftir tímabilið. Stefán Árnason tekur við starfi hans.

Gunnar er nú kominn með nýtt starf en hann tekur við Haukum í sumar. Gunnar þekkir vel til hjá félaginu en hann þjálfaði karlaliðið á árunum 2015-20. Undir hans stjórn urðu Haukar Íslandsmeistarar 2016 og deildarmeistarar 2016 og 2019.

Gunnar er einn reyndasti þjálfari landsins en hann hefur einnig þjálfað karlalið Víkings, HK og ÍBV. Þá var hann lengi í þjálfarateymi íslenska karlalandsliðsins. Hann gerði Eyjamenn einnig að Íslandsmeisturum og bikarmeisturum og undir hans stjórn urðu Mosfellingar bikarmeistarar fyrir tveimur árum.

Ásgeir Örn hefur stýrt Haukum frá því í nóvember 2022. Undir hans stjórn komst liðið í úrslit um Íslandsmeistaratitilinn 2023.

Haukar eru í 5. sæti Olís-deildarinnar þegar tveimur umferðum er ólokið. Þá eru Haukar komnir í átta liða úrslit EHF-bikarsins þar sem þeir mæta Izvidac frá Bosníu.