Besta-spáin 2025: Siglt undir radarinn

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með leik Íslandsmeistara Breiðabliks og Aftureldingar laugardaginn 5. apríl.

Íþróttadeild spáir Val 3. sæti Bestu deildarinnar í sumar og að liðið endi á sama stað og á síðasta tímabili.

Væntingastuðullinn hjá Val sprakk eftir komu Gylfa Þórs Sigurðssonar skömmu fyrir síðasta tímabil. Að margra mati voru þeir líklegastir í baráttunni um Íslandsmeistaratitilinn en raunin varð önnur. Vissulega glitti oft í glimrandi spilamennsku en of sjaldan og Arnar Grétarsson var látinn taka pokann sinn eftir tap fyrir St Mirren í Sambandsdeild Evrópu. 

Srdjan Tufegdzic (Túfa) var klár á kantinum og tók við. En engin umpólun varð á gengi eða spilamennsku Vals við þjálfarabreytinguna. Liðið náði samt Evrópusæti sem var væntanlega algjör lágmarkskrafa á Hlíðarenda.

Gylfi spilaði vel fyrir Val í fyrra og skoraði ellefu mörk. Honum leist þó ekki lengur á blikuna á Hlíðarenda og knúði fram félagaskipti í Víking. Stolt Valsmanna var eflaust sært eftir þetta en hægur vandi ætti að vera að nýta þetta sem hvata fyrir tímabilið sem framundan er.

Það eru nefnilega áfram forsendur til að gera vel hjá Val. Þeir eru til að mynda enn með Jónatan Inga Jónsson, Patrick Pedersen og Tryggva Hrafn Haraldsson í framlínunni. Þeir skoruðu samtals 38 mörk í Bestu deildinni í fyrra og þrátt fyrir að verða 34 ára á árinu virðist ekkert vera að hægjast á Pedersen. Mörkin hans níu í Lengjubikarnum eru til vitnis um það. Jónatan Ingi átti frábæra kafla á síðasta tímabili og hann hefur allt að bera til geta verið einn besti leikmaður deildarinnar.

Auk Gylfa er Birkir Már Sævarsson horfinn á braut eftir mikla og góða þjónustu við Val og Fredrik Schram fór til Danmerkur. Birkir Heimisson er kominn aftur frá Þór, Tómas Bent Magnússon frá ÍBV, Birkir Jakob Jónsson frá Atalanta, Andi Hoti frá Leikni R. og tveir erlendir leikmenn með flottar ferilskrár bættust við; miðvörðurinn Markus Nakkim og miðjumaðurinn Marius Lundemo.

Þeim síðarnefnda er ætlað að leysa vandræði síðasta tímabils með stöðu varnarsinnaðs miðjumanns og ef hann verður jafn góður og ferilskráin gefur tilefni til geta Valsmenn hugsað sér gott til glóðarinnar. Liðið hefur nefnilega litið vel út í vetur, vann Lengjubikarinn og eftir brotthvarf Gylfa er pressan kannski ekki jafn mikil á Hlíðarenda, eða allavega öðruvísi.

Túfa þarf samt nauðsynlega að laga varnarleikinn frá síðasta tímabili. Valur fékk á sig 42 mörk og hélt aldrei hreinu eftir að Túfa tók við. Hann hefur jafnan verið kenndur við gott skipulag og traustan varnarleik en stóð ekki beint undir því í fyrra. Og þótt sóknarleikur Vals hafi stundum verið svolítið klossaður skoraði liðið samt 66 mörk á síðasta tímabili. Sóknaraflið í liðinu er einfaldlega það mikið.

Túfa hefur prófað sig áfram með þriggja manna vörn í vetur og ýmsar útfærslur með bakverði. Liðið hefur fengið yngri leikmenn en síðustu ár og spurning hvort mótorinn hjá Val verði öflugri en verið hefur.

Þetta hefur allavega litið vel út í vetur og það er sannarlega líf eftir Gylfa. Stuðningsmenn Vals vilja að minnsta kosti Evrópusæti og ef flest gengur upp gætu Valsmenn allavega sett smá pressu á Víkinga og Blika í titilbaráttunni.