„Ætla ekki að standa hérna og af­saka neitt“

Ísland tapaði 3-1 í heimaleik sínum í Murcia á Spáni í kvöld, gegn Kósovó, og þar með einvígi liðanna 5-2.

„Áfram gakk. Tveir vináttuleikir í sumar þar sem við þurfum að slípa okkur betur saman, það er ljóst,“ segir Aron en viðtal Arons Guðmundssonar við hann má sjá hér að neðan.

Aron fékk að líta sitt annað gula spjald og þar með rautt á 69. mínútu, eftir að hafa komið inn á sem varamaður í upphafi seinni hálfleiks. Hann var afar ósáttur við dóminn en hægt er að sjá atvikið í viðtalinu hér að ofan:

„Hefðir þú verið sáttur? Hefði þetta verið beint rautt þá hefði það farið beint í VAR. Hundrað prósent. En ég ætla ekki að standa hérna og afsaka neitt. Ég kem mér í þessa aðstöðu. Hann er að halda í mig, ég er að halda í hann. Hann lætur sig detta og tosar mig niður, þannig að þetta lúkkar eins og ég hafi verið að taka hann niður en Logi er svo með boltann, svo ég skil ekki af hverju þetta er seinna gula. Þetta er mjög soft seinna gula en við breytum því ekki. Ég fékk bara reisupassann og þarf að taka ábyrgð á því,“ segir Aron.

Staðráðinn í að halda áfram

Fyrstu leikirnir undir stjórn Arnars Gunnlaugssonar fóru illa en hvernig líst Aroni á stöðuna?

„Það er margt sem við erum að breyta. Margt sem við erum að læra. Það er samt ekki afsökun því við þurfum að vinna fleiri einvígi, fleiri seinni bolta. Það eru grunnatriði sem við þurfum að hugsa um. Hitt kemur. Ég hef fulla trú á því. En það er margt sem við þurfum að hugsa út í

Við erum bara að fókusera á undankeppni HM og við erum svo sannarlega með lið til að berjast um sæti þar. En það er margt sem við þurfum að líta til og bæta,“ segir hann.

Og Aron vill taka þátt í þessari vegferð, eða hvað?

„Auðvitað.“