Vill hópfjármögnun fyrir Antony

Antony fékk mikið hrós frá Isco sem var valinn maður leiksins eftir borgarslaginn í Sevilla um helgina, þar sem Real Betis vann Sevilla 2-1.

„Við verðum að setja í gang hópfjármögnun svo að hann geti verið áfram hérna á næstu leiktíð. Við höfum fundið breytinguna frá því að hann kom hingað. Hann færir okkur margt,“ sagði Isco í beinni útsendingu DAZN.

Sigurinn gegn Sevilla var sjötti sigur Real Betis í röð í deildinni, þar sem liðið er nú jafnt Villarreal í 5.-6. sæti og í harðri baráttu um sæti í Meistaradeild Evrópu á næstu leiktíð. Þá er liðið komið í 8-liða úrslit Sambandsdeildar Evrópu.

Antony kom að láni til Real Betis í janúar en lánssamningurinn gildir fram á sumar. Hann er svo samningsbundinn næstu tvö árin hjá United sem keypti hann frá Ajax fyrir himinháa upphæð, eða 82 milljónir punda, sumarið 2022.