KA kaus að losa sig við þjálfarann

Frá þessu er greint á miðlum KA þar sem segir að um erfiða ákvörðun sé að ræða, eftir krefjandi vetur. Halldóri sé þakkað innilega fyrir sín störf eftir að hafa lagt líf og sál í KA-liðið síðustu tvö ár. Leit sé hafin að nýjum þjálfara.

Halldór Stefán gerði samning til þriggja ára þegar hann tók við KA af Jónatani Magnússyni árið 2023. Hann sneri þá heim til Íslands eftir að hafa þjálfað Volda í Noregi um langt árabil en því liði kom hann úr C-deild og upp í norsku úrvalsdeildina.

KA rétt missti af sæti í úrslitakeppni Olís-deildarinnar í ár en deildarkeppninni var að ljúka. KA endaði með 15 stig úr 22 leikjum, stigi á eftir HK sem tók síðasta sætið í úrslitakeppninni.

Í fyrra varð KA í 8. sæti í deildinni en féll svo úr leik gegn verðandi Íslandsmeisturum FH í fyrstu umferð úrslitakeppninnar.