McIlroy stoltur af sjálfum sér

Eftir að hafa leikið vel á fyrsta hring Masters fékk McIlroy tvo skramba á síðustu þremur holunum. Hann gerði hins vegar engin mistök í gær, lék annan hringinn á sex höggum undir pari og fékk ekki einn skolla.

McIlroy er í 3. sæti fyrir síðustu tvo hringina, tveimur höggum á eftir Justin Rose og einu höggi á eftir Bryson DeChambeau.

„Ég er, heilt yfir, bara stoltur af sjálfum mér hvernig ég brást við í dag [í gær] eftir endinn í gær [í fyrradag]. Ég þurfti bara að minna mig á að ég spilaði mjög gott golf í gær [í fyrradag],“ sagði McIlroy eftir annan hringinn.

„Ég var ekki að fara láta tvær slæmar holur eyðileggja fyrir mér. En ég er bara stoltur af því hvernig ég kom mér aftur inn í þetta.“

Eftir að hafa klárað fyrsta hringinn dreif McIlroy sig til fjölskyldu sinnar og náði að hitta dóttur sína, Poppy, áður en hún sofnaði. Hann átti einnig gott spjall við íþróttasálfræðinginn sinn.

„Ég held að ég hafi ekki sannað neitt en staðfesti bara trúna sem ég hef á sjálfum mér og að ég sé jafn seigur eins og allir þarna,“ sagði McIlroy.

Sem frægt er hefur McIlroy ekki unnið risamót síðan 2014 og Masters er eina risamótið sem hann á eftir að vinna á ferlinum. Norður-Írinn vann PGA-meistaramótið 2012 og 2014, Opna bandaríska 2011 og Opna breska 2014.

Bein útsending frá þriðja degi Masters hefst klukkan 16:00 á Stöð 2 Sport 4. Hitað verður upp fyrir þriðja daginn frá klukkan 15:30.