Skuggavaldið: Dýrð og dauði dansa saman í blóði og bjarma

Prófessorarnir Eiríkur Bergmann og Hulda Þórisdóttir ræða um lokahnykkinn í sögu fjölskyldunnar sem á stundum virðist líkari grískum harmleik, þar sem dýrð og dauði dansa saman í blóði og bjarma.

Einn áhrifamesti efasemdamaður bóluefna

Nú, árið 2025, er Kennedy-fjölskyldan snúin aftur til valda eftir að Robert F. Kennedy Jr. var skipaður heilbrigðisráðherra. Sá er ansi langt frá arfleifð valdafjölskyldunnar sem hann tilheyrir. RFK fór frá því að vera virtur umhverfislögfræðingur yfir í að vera einn áhrifamesti efasemdamaður bóluefna og boðberi margra staðlausra samsæriskenninga. 

Líkt og rakið er í þættinum er saga hans stráð svo einkennilegum vendingum að á stundum líkist hún helst rússíbana smíðuðum úr skuggum og holtaþoku.

Í fyrri þáttum Skuggavaldsins var meðal annars rætt um morðið á John F. Kennedy en nú er komið að því að rýna í örlög bróður hans, Robert F. Kennedy, eða Bobby, sem einnig var skotinn til bana á pólitísku ferðalagi. 

Morð forseta, árásir á leiðtoga og hryðjuverk þræðir

Eftir að hafa unnið forkjör Demókrataflokksins fyrir forsetakosningarnar í Kaliforníu árið 1968 og fagnað því með stuðningsfólki á Ambassador-hótelinu í Los Angeles var Robert skotinn niður á eldhúsgangi hótelsins – undir flúorlýsingu og innan um lykt af grænsápu og fitugum hamborgurum.

Í þættinum er einnig farið yfir blóði drifna stjórnmálasögu Bandaríkjanna, þar sem morð forseta, árásir á leiðtoga og hryðjuverk eru ekki undantekning heldur þræðir í sjálfum vefnaði bandarískra stjórnmála. Frá Lincoln til Trump, frá Oklahoma til Capitol Hill – ofbeldið er ekki bara óvænt hending, heldur þrálátur þáttur í sjálfsmynd þjóðar sem trúir á frelsi, en óttast skuggana sem læðast allt um kring um nætur.

Prófessorarnir Hulda og Eiríkur beita einnig skurðhnífi fræða sinna í þættinum til þess meðal annars að skýra hvernig stórir atburðir kalli á álíka stórar útskýringar. Morð á forseta? Það getur ekki verið bara einn maður og ein byssa. Það hlýtur að vera eitthvað stærra, dýpra, dimmara.

Lokaþáttur þríleiks Skuggavaldsins um Kennedy-bölvunina er nú ásamt þeim fyrri aðgengilegur í hlaðvarpsveitum. Í næstu þáttum snúa Hulda og Eiríkur sér að dularfullri sögu Illuminati-bræðrareglunnar frá Bæjaralandi í Þýskalandi sem sumir samsæriskenningasmiðir gruna að stýri heiminum á bak við tjöldin.