Há­tíð sem er skipu­lögð í kringum yngstu kyn­slóðina

Hátíðin hefst klukkan 11 og stendur til 16. Markmið hátíðarinnar er að auka aðgengi barna að tónlist og því er frítt á alla viðburði. Tólf börn, sérstakir erindrekar, hafa farið í þjálfun hjá Ingibjörgu Fríðu sjónvarpskonu og munu taka á móti gestum í Hörpu og leiða þau um svæðið.

„Við erum að halda þetta í fjórða skiptið og erum að læra af reynslunni og verða betri og betri. Hátíðin hefur alltaf verið góð en ég held að við séum að toppa okkur núna,“ segir Elfa Lilja Gísladóttir listrænn stjórnandi hátíðarinnar.

Lagskipt hátíð

Margir viðburðanna fara fram oft yfir daginn og eru skipulagðir með yngstu kynslóðina í huga.

„Í rauninni er þessi tónlistarhátíð, Big Bang, lagskipt. Það eru tónleikar þar sem fólk kemur inn og sest en mjög oft er þarna verið að mæta yngstu börnunum, yngri kynslóðinni. Þau eru ekki látin setjast í stól og hlusta. Það þarf að mótivera og búa til dagskrá sem mætir þeim og þeirra aldurshópi.“

Elfa Lilja segist ætla að setja markið hátt og reyna að sjá alla viðburðina og hefur mikla trú á að það sé hægt ef fólk skipuleggur sig vel. Bæði verða á hátíðinni innlendir og erlendir aðilar. Sem dæmi koma Trio Oro frá Noregi og Zigoto frá Belgíu.

„Svo fáum við gesti frá Búlgaríu. Við erum líka með nýjan viðburð frá Los Pomponeros og Rímnadanshljómsveitina S.L.Á.T.U.R og Dýratóna. Það eru alls 44 listamenn sem troða upp hér og þar um húsið þannig þetta er ótrúlegt ævintýri sem við erum að leggja upp með.“

Smiðjur og vinnustofur og tónlist

Börnin eru þannig tekin í ferðalag um húsið og geta tekið þátt í smiðjum og vinnustofum. Þá er einnig opnað fyrir þátttöku barna en til dæmis tekur Skólahljómsveit Kópavogs þátt og spilar með hljómsveitinni Watachico.

„Þetta er fyrir alla aldurshópa. Hljómsveitir eru líka að spila fyrir fullorðna en þarna erum við með áherslu á yngsta aldurshópinn. Við erum með styttri tónleika, við erum með styttri verk og þannig með fókus á yngri kynslóðina.“

Elfa Lilja hvetur fólk til að fara í Hörpu og upplifa sem mest.

„Það er hægt að dvelja þarna í marga klukkutíma og bara njóta. Svo er hægt að fara í bókasafnið og hvíla sig þar eða fara á einhverja innsetningu. Fólk getur ráðið hvort það er í einn klukkutíma eða marga klukkutíma. Fólk bara mætir í sínu sumarskapi. Mér skilst á veðurspáni að það verði hlýtt og gott,“ segir Elfa Lilja að lokum.