Syndis kaupir Ísskóga

Frá þessu segir í tilkynningu. Fram kemur að með kaupunum auki Syndis við getu sína á sviði upplýsingaöryggis, með sérstakri áherslu á ráðgjöf og innleiðingu stjórnkerfa upplýsingaöryggis (ISMS).

„Ísskógar var stofnað árið 2018 af Oddi Hafsteinssyni en hann hefur starfað við upplýsingatækni í 25. Ísskógar hefur aðstoðað við mat, innleiðingu, framkvæmd og eftirlit með upplýsingaöryggismálum fyrirtækja og stofnana.

Með kaupunum mun Syndis geta boðið núverandi viðskiptavinum Ísskóga breiðara þjónustuframboð og dýpri sérhæfingu á sviði upplýsingatækni, áhættustýringar til samræmis við alþjóðlega staðla eins og ISO27001,“ segir í tilkynningunni. 

Haft er eftir Antoni Má Egilssyni, forstjóra Syndis, að Syndis fagni því að Oddur Hafsteinsson hafi gengið til liðs hópinn. Oddur komi með mikla reynslu úr bæði opinbera og einkageiranum og bætist í hóp sérfræðinga fyrirtækisins í upplýsingaöryggi.

„Sameiningin markar skref í þeirri stefnu Syndis að byggja upp heildstæða þjónustu á sviði öryggismála, þar sem bæði sóknar- og varnarþekking eru tekin saman í eina sterka heild. Með tilkomu Ísskóga styrkir Syndis þá stoð sem snýr að langtímaöryggi og mótun stefnu í samræmi við kröfur, lög og reglur,“ segir í tilkynningunni.