„Ye mátti þola versnandi and­lega heilsu vegna gjörða þinna“

Hjónin hafa sent tannlækninum bréf þess efnis að þau hyggist lögsækja hann að 90 dögum liðnum fyrir vítaverða vanrækslu og afglöp í starfi, fjársvik og fjárhagslega misnotkun. 

Milo Yiannopoulos, talsmaður West, birti bréfið á X (Twitter) í fyrradag og lögfræðingurinn Andrew Cherkasky staðfesti lögmæti þess í samtali við Rolling Stone og jafnframt að hann væri lögfræðingur hjónanna í málinu.

„Skjólstæðingar okkar hyggjast höfða málsókn gegn þér fyrir vítavert gáleysi í meðferð sjúklings, vanrækslu í starfi og tengd bótaskyld brot á samningum sem eiga rætur sínar að rekja til meðferðar þinna á Ye,“ segir í bréfinu til Connelly.

„Framferði þitt fór hraksmánarlega langt niður fyrir viðeigandi staðla umönnunar og braut í bága við þínar lagalegu og starfstengdu skyldur, sem ollu skjólstæðingum okkar umtalsverðum skaða,“ sagði jafnframt.

Hláturgas „eingöngu til dægrastyttingar“

Fram kemur í bréfinu að West hafi fyrst komið til Connelly í byrjun árs 2024 og gengist þar undir ýmiss konar aðgerðir, þar á meðal fengið sérstaka títaníumkrúnu.

Í bréfinu er því haldið fram að Connelly hafi útvegað West nituroxíð, betur þekkt sem hláturgas, í magni sem ekki væri hægt að réttlæta læknisfræðilega. Connelly hafi útvegað West hláturgas „eingöngu til dægrastyttinga“ og leiðbeint rapparanum hvernig hann gæti andað því að sér sjálfur.

„Þú gekkst svo langt að senda stóra nituroxíð-tanka í ,skurðaðgerðar-stærð' til íbúðarhúsnæðis Ye, húsnæðis sem hann deildi með fröken Censori, og þannig gert honum kleift og hvatt hann til að anda að sér nituroxíði utan læknisfræðilegs vettvangs,“ segir í bréfinu.

Með því að breyta „kraftmiklu svæfingarlyfi“ í lyf sem mætti taka með sér heim hefði Connelly sýnt af sér vítavert skeytingarleysi fyrir heilsu og öryggi rapparans.

Geðsveiflur, kvíði og þunglyndi vegna fíknarinnar

Í bréfinu er því haldið fram að í maí 2024 hafi West byrjað að „sýna merki fíknar og taugafræðilegum skaða“ sem fólst meðal annars í því að hann gekk gjarnan um með öndunargrímu, fengið þráhyggju fyrir hláturgasi og sýnt önnur merki um „misnotkun og eituráhrif“.

Connelly hafi af ásettu ráði hunsað þessi varúðarmerki. Cherkasky heldur því fram að Connelly hafi gengist við því í skilaboðum og netpósti að hann hafi gert „mistök“ í meðferðinni. Það undirstriki svívirðileika hegðunarinnar og til marks um vanrækslu hans.

Þá er því haldið fram í bréfinu að Connelly hafi misnotað viðkvæma stöðu West með því að rukka hann mánaðarlega um 50 þúsund (um 6,46 milljónir króna) fyrir „stöðugar birgðir“ af nituroxíði. Eftir að hafa alið fíkn með West hafi hann svipt rapparann þjónustu samstundis frekar en að tryggja að West fengi hjálp.

„Ye mátti þola versnandi andlega heilsu vegna gjörða þinna. Hann upplifði aukinn rugling, geðsveiflur, kvíða og þunglyndi,“ segir í bréfinu.

Ætli í meðferð við hláturgasfíkn

West hafi ákveðið að fara í meðferð við fíkn sinni til að afeitrast og jafna sig. Kennir hann hláturgasfíkn sinni um „umtalsvert fjárhagstjón“ og vandræði í hjónabandi hans við Censori. Hún hafi fyrir vikið verið svipt stuðningi, samfylgd og hjúskap við eiginmann sinn á þessu tímabili.

Þess er krafist í bréfinu að Connelly hafi samband við tryggingafyrirtæki sitt svo hægt sé að komast að niðurstöðu í málinu. Cherkasky fer fyrir máli West og Censori ásamt Katie Cherkasky, meðeiganda sínum og maka.

Kanye var um margra ára bil einn stærsti tónlistarmaður í heimi en vakti reglulega athygli fyrir óviðeigandi hegðun og yfirlýsingar. Síðustu þrjú ár hefur þessi ofstopafulla hegðun rapparans færst í aukana, hann hefur ítrkeðað lýst yfir aðdáun sinni á Hitler, gerst sekur um andgyðingleg ummæli og farið mikinn á samfélagsmiðlum með hatursfullum skrifum.

Þá greindi hann einnig frá því að hann hefði verið ranglega verið greindur með geðhvörf og væri í raun einhverfur. Á sama tíma hefur reglulega verið fjallað um að hjónaband hans við hina áströlsku Censori sé á barmi skilnaðar.

Síðasta plata West, Donda 2, kom út 2022 í ókláruðu formi á tónlistarveitunni Stem Player. West uppfærði plötuna töluvert og gaf út á öllum streymisveitum í síðasta mánuði. Lítið fór fyrir útgáfuna enda hafa tónlistarlegum gæðum hrakað gríðarlega hjá rapparanum. 

West stefnir á að gefa út plötuna Cuck í þessum mánuði og hefur birt lög og lagabrot af henni. Sammerkt með þeim er mikil áherslu á nasisma og Hitler. Hér fyrir neðan má heyra lagið WW3: