Erfitt að flytja tíma­bundið heim í tóm hús

Frá og með 28. maí munu þeir sem gert hafa svokallaðan hollvinasamning um sínar gömlu eignir í Grindavík einnig geta gist í þeim, fram á haust, eða út september.

Óvissan um hvað gerist í haust, þegar tilraunaverkefninu lýkur, er mörgum í huga. Þá þurftu flestir að tæma hús sín þegar bærinn var rýmdur svo það gæti reynst þeim erfitt að halda til í húsunum.

Hollvinasamningar hafa staðið Grindvíkingum, sem selt hafa fasteignafélaginu Þórkötlu hús sín í bænum, til boða frá ágúst í fyrra. Um er að ræða samning um afnot og aðgengi að húsunum gegn greiðslu þrjátíu þúsund króna einskiptisumsýslugjalds og mánaðarlegs kostnaðar af hita og rafmagni.

Markmiðið er að ýta undir að haldi tengsl við Grindavík og auka líkur á að þeir flytji aftur þangað þegar það er öruggt.

Sjá einnig: Grindvíkingar fá að gista í húsunum sem þeir seldu

Fréttastofa ræddi við nokkra Grindvíkinga í bænum í dag. Þeir voru allir á því að um jákvætt skref væri að ræða en töluðu um að hægt væri að gera þetta betur.

Einnig var rætt við Valgerði Ágústsdóttur, sem situr í stjórn Járngerðar, hagsmunasamtaka Grindvíkinga. Hún sagði verkefnið hafa gríðarlega þýðingu fyrir Grindvíkinga. Þórkatla ætti nánast öll íbúðarhús í bænum.

„Við sjáum fyrir okkur að það verði meira líf hérna næstu misserin. Hins vegar finnst okkur að það hefði mátt vera meiri fyrirsjáanleiki,“ segir Valgerður. Vísar hún til þess að fólk gæti séð lengur fram í tímann en í september. Flestir væru búnir að tæma húsin sín og erfitt að fylla þau aftur, fyrir mögulega stuttan tíma.

Næst sagði Valgerður að Grindvíkingar vildu sjá að á meðan hættan væri ásættanleg vildi fólk vita fram í tímann að það geti verið áfram í bænum. Hún sagði þau í samtökunum einnig hafa áhyggjur af fólki sem hafa ekki tök á að gera hollvinasamning. Eigi ekki efni á því að standa í þessum aukakostnaði.

Ríflega sjötíu milljarða fjárfesting

Þórkatla hafi gengið frá kaupum á 943 eignum í Grindavík, tekið við 913 eignum og gengið frá afsali fyrir 904 eignir í Grindavík. Heildarfjárfesting félagsins í þeim 943 eignum sem gengið hefur verið frá til þessa sé 71,6 milljarðar króna. Þar af séu kaupsamnings- og afsalsgreiðslur um 50 milljarðar og yfirtekin húsnæðislán um 21,6 milljarðar.

Frestur einstaklinga til að sækja um sölu á íbúðarhúsnæði í Grindavík hafi runnið út 31. mars síðastliðinn en lög um framlengingu á frestinum til 30. júní 2025 séu í vinnslu hjá Alþingi sem stendur.