„Þú hakkar ekki á tóman maga“

Í hljóðlátri stofu í HR í dag unnu tólf bestu hakkarar landsins hörðum höndum í netöryggiskeppni sem ber nafnið Gagnaglíman.

Markmið keppninnar er að hvetja ungt fólk í hakki og er hún styrkt af netöryggisfyrirtækinu Syndis. Vonir eru bundnar við að efla netöryggisvarnir Íslands.

„Þetta er byggt á evrópuverkefni sem er stutt af netöryggisstofnun Evrópu. Það er í raun keppt í því að þátttakendur eru að reyna brjótast inn í alls konar þjónustur og slíkt og æfa þessar aðferðir hakkaranna til að verjast þeim,“ segir Hjalti Magnússon, formaður Gagnaglímufélags Íslands.

„Það verður alltaf að vera nóg af gosi“

Í stofunni tekur á móti manni ilmur frá pítsum og annars konar narsli. Hjalti segir það hornstein í góðu hakki.

„Þú hakkar ekki á tóman maga, það verður alltaf að vera nóg af gosi og mönchi.“

Mikilvægt sé að virkja ungt fólk á tímum þar sem netöryggi verður sífellt mikilvægara.

Er jafnvel skortur á hökkurum á Íslandi? 

„Það er gríðarlegur skortur og við myndum vilja hafa þennan viðburð miklu stærri en við höldum áfram að gera okkar allra besta og halda áfram að lokka til okkar ungt og efnilegt fólk.“

Vill fá fleiri konur í hakkið

Að lokinni keppni verður valið tíu manna lið til að taka þátt fyrir hönd Íslands í netöryggiskeppni Evrópu sem er haldin í höfuðborg Póllands í október. 

Ein af þeim sem bindir vonir sínar við að komast út er Vigdís Helga.

„Ég hef bara tekið þátt í einni keppni og það var með hóp. Svo það gekk aðeins betur því þá voru fimm saman. Einmitt núna er ég að reyna finna út úr því hvernig ég á að skoða ákveðna skrá sem ég man bara ekki alveg hvernig ég á að gera, til að komast að því hvað flaggið er sem er í rauninni bara svona setning.“

Vigdís hefur nýlega lagt fyrir sig hakkið og starfar nú við tölvuöryggi.

Og er þetta skemmtilegt? 

„Mér finnst það allavega. Ég væri bara til í að það væru fleiri konur í þessu.“

Ert þú eina konan hérna í dag?

„Já, ég er eina konan en ég vissi ekki að ég væri að fara vera eina konan. Markmiðið mitt er allavega að fá fleiri konur í þetta og sérstaklega ungar stelpur.“

,,Markmið Gagnaglímunnar er að hvetja ungt fólk til að kynna sér netöryggi og auka áhuga þess á því að starfa á þeim vettvangi. Það er öllum ljóst að mikilvægi netöryggis í nútímasamfélagi er gríðarlegt. Tugprósenta vöxtur varð í tilraunum til netárása á síðasta ári og þróunin er sú að þeim fjölgar enn. Íslensk fyrirtæki og stofnanir hafa ekki farið varhluta af því. Það er því sífellt verið að leita leiða til að efla varnirnar og leita eftir hæfileikaríku fólki til að takast á við þær áskoranir sem fylgja netöryggismálum," er haft eftir Antoni Má Egilssyni, forstjóri Syndis, í fréttatilkynningu um viðburðinn. Syndis er ásamt Aftra styrktaraðili keppninnar.

Gagnaglíman er haldin af frumkvæði Innviðaráðuneytisins en þetta er í sjötta sinn sem keppnin fer fram.