Gerir ekki ráð fyrir miklum breytingum á leikmannahópnum

Ágúst Jóhannsson mun stýra karlaliði Vals í Olís-deila karla í handbolta og tekur hann við liðinu af Óskari Bjarna Óskarssyni.

Ágúst er hættur með kvennalið Vals eftir magnað tímabil með liðinu. Karlaliðið tapaði úrslitaeinvíginu gegn Fram um Íslandsmeistaratitilinn á dögunum 3-0. Liðið varð deildarmeistari en á Hlíðarenda eru kröfurnar meiri og gerir Ágúst sér vel grein fyrir því.

„Ég veit að í Val er bara pressa og menn vilja berjast um alla titla. Það verður engin breyting á því og ég fer bara yfirvegaður í það. Við ætlum hægt og rólega að reyna nota yngri stráka líka í bland við þessa eldri og reyndari,“ segir Ágúst í Sportpakkanum á Stöð 2 í gær. Hann segir að það verði ekki miklar breytingar á leikmannahópi Vals fyrir næsta tímabil.

„Liðið er bara feikilega vel mannað en kannski þarf eitthvað að reyna hressa upp á þetta og reyna koma yngri strákum inn í þetta. Við erum með marga efnilega stráka og erum Íslandsmeistarar í þriðja flokki. Við erum með marga unga og efnilega leikmenn sem hafa stígið sín fyrstu skref í vetur. Svo er það mitt og þjálfarana að hjálpa þeim að taka næstu skref í því.“