Afla­mark þorsks lækkað og reiknað með að stofninn minnki á­fram

Í fréttatilkynningu frá Hafró segir að aflamark þriðja tug stofna sé lagt til á grundvelli langtímamarkmiða um sjálfbæra nýtingu. Ráðgjöfina í heild sinni megi nálgast á vef Hafrannsóknastofnunar undir Ráðgjöf.

Þorsksstofninn dragist saman næstu árin

Hafró ráðleggi fjögurra prósenta lækkun aflamarks þorsks fiskveiðiárið 2025/2026. Sú ráðgjöf byggi á aflareglu stjórnvalda. Því lækki ráðlagður heildarafli úr 213.214 tonnum á yfirstandandi fiskveiðiári í 203.822 tonn. Um er að ræða minnsta ráðlagða þorskafla frá árinu 2013. Gert sé ráð fyrir að stærð viðmiðunarstofns þorsks dragist saman næstu tvö til þrjú ár. 

Ástæðuna megi rekja til þess að árgangarnir frá 2021 og 2022 séu áfram metnir undir meðallagi. Þeir komi til með að ganga inn í viðmiðunarstofninn í ár og á næsta ári. Einnig séu árgangarnir frá 2019 til 2021 hægvaxta, sem talið sé tengjast slöku ástandi loðnustofnsins.

Upphafsaflamark fyrir næstkomandi loðnuvertíð samkvæmt aflareglu strandríkja sé 46.384 tonn. Þessi ráðgjöf verði uppfærð áður en veiðar hefjast að lokinni haustmælingu. Til samanburðar var loðnukvótinn í ár innan við níu þúsund tonn.

Stofn ýsu í hæsta gildi

Samkvæmt nýuppfærðri aflareglu verði aflamark ýsu 78.918 tonn, sem sé þriggja prósenta hækkun á ráðgjöf frá yfirstandandi fiskveiðiári. Stærð viðmiðunarstofns sé metin við sitt hæsta gildi. Líkur séu á því að stærð viðmiðunarstofns muni haldast há á næsta ári vegna góðrar nýliðunar áranna 2019 til 2021, en árgangarnir sem koma þar á eftir séu metnir litlir.

Ráðgjöf fyrir ufsa samkvæmt uppfærðri aflareglu lækki um ellefu prósent frá yfirstandandi fiskveiðiári og sé 59.510 tonn.

Ráðgjöf fyrir gullkarfa sé 41.911 tonn eða tólf prósentum lægri en á yfirstandandi fiskveiðiári. Nýliðun gullkarfa hafi verið slök undanfarinn áratug og af þeim sökum hafi hrygningarstofninn farið minnkandi. Fyrirséð sé að sú þróun haldi áfram og á komandi árum þurfi að draga verulega úr sókn.

Áfram sé lagt til að aflamark djúpkarfa verði núll tonn þar sem hrygningarstofninn sé metinn undir varúðarmörkum. Miðað við fyrirliggjandi gögn sé ekki búist að stofninn fari upp fyrir varúðarmörk í fyrirsjáanlegri framtíð þar sem nýliðun í stofninn hafi verið metin mjög lág um nokkurt skeið.

Ráðgjöf fyrir grálúðu hækku um sautján prósent frá fyrra ári og sé nú 20.992 tonn. Ráðlagt aflamark sé hærra vegna aukningar á heildarstofnstærð. Útlit sé fyrir að stofninn fari vaxandi á næstu árum vegna góðrar nýliðunar.

Sumargotssíldin kemur sterk inn

Ráðgjöf um aflamark íslensku sumargotssíldarinnar fyrir komandi fiskveiðiár hækki um 27 prósent og sé 103.367 tonn. Ástæðan sé sú að stórir árgangar frá 2017-2019 séu áberandi í veiðistofninum. Gert sé ráð fyrir að ráðgjöf muni lækka á næstu árum þegar yngri árgangar bætast við veiðistofninn en þeir séu metnir talsvert minni. Óvissa sé umtalsverð í stofnmatinu og mikils ósamræmis gæti í vísitölum milli áranna 2024 og 2025.

Að auki við ráðgjöf um aflamark birtist yfirlit yfir meðafla sjávarspendýra og sjófugla í veiðum á hafsvæðinu við Ísland. Helstu niðurstöður séu þær að frá seinustu mælingum hafi dregið úr meðafla en hann sé enn töluverður. 

Meðafli tegunda þar sem stofnstærð er lítil eða hefur minnkað, eins og landsels, teistu og himbrima sýni mikilvægi vöktunar bæði á meðaflamagni og stofnstærðum þessara tegunda.

Á töflunni hér að neðan má sjá yfirlit yfir ráðgjöf stofnunarinnar: