Fram­lengja við markahæsta manninn sinn

Ásgeir hefur skorað í tveimur síðustu leikjum KA í Bestu deildinni og er langmarkahæsti leikmaður liðsins í sumar með fjögur mörk. Enginn annar hefur skorað fleiri en eitt mark.

„Þetta eru stórkostlegar fréttir enda Geiri algjör lykilmaður í okkar liði og stórkostlegur karakter sem hefur átt mikinn þátt í uppgangi KA-liðsins undanfarin ár,“ segir í frétt á miðlum KA.

Ásgeir sem er 28 ára gamall kom á láni til KA fyrir sumarið 2016 frá norska liðinu Stabæk og sló heldur betur í gegn er KA tryggði sér loksins sæti í efstu deild með sannfærandi sigri í Inkasso deildinni. Ásgeir skoraði átta mörk það sumarið og þar á meðal sigurmarkið gegn Selfyssingum sem tryggði úrvalsdeildarsætið.

Í kjölfarið gekk Ásgeir endanlega til liðs við KA og hefur verið burðarás í liðinu síðan. Hann er nú einn leikjahæsti leikmaður í sögu félagsins en hann hefur leikið alls 215 leiki fyrir KA í deild, bikar og evrópu og gert í þeim alls 55 mörk.

Ásgeir hefur nú jafnað við Elfar Árna Aðalsteinsson í öðru sætinu yfir markahæstu leikmenn KA í efstu deild. Báðir hafa skorað 45 mörk. Ásgeir er einnig næstleikjahæsti leikmaður KA í efstu deild.