Fyrrum met­hafi lést að­eins 28 ára

Kipsang er látinn aðeins 28 ára að aldri. Hann lést úr hjartaáfalli.

Kipsang setti háskólametið í 1500 metra hlaupi árið 2022 þegar hann kom í mark á 3:33.74 mín. Það var ekki slegið fyrr en í ár.

Kipsang keppti fyrir Alabama skólann og var eina af íþróttastjörnum skólans ekki síst eftir að hann setti metið sitt.

Kipsang var fluttur á sjúkrahús eftir að hafa farið í hjartastopp síðastliðinn föstudag. Hann var á gjörgæslu í fjóra daga en ekki tókst að bjarga lífi hans og hann lést á þriðjudaginn var.

Kipsang kallaði sjálfan sig „Konung hlaupabrautarinnar“ á samfélagsmiðlum þegar hann var í skólanum.

Í desember 2023 skrifaði hann undir auglýsingasamning við Adidas en hafði ekki keppt síðan í júlí á síðasta ári.

Kipsang lést aðeins degi áður en meistaramót bandarísku háskólanna hófst og það má búast við því að honum verði minnst sérstaklega á mótinu. Skólinn hans og aðrir hafa minnst hans á samfélagsmiðlum og sent fjölskyldu og vinum samúðarkveðjur.

Það hefur líka verið stofnuð söfnunarsíða á GoFundMe til að safna fyrir jarðarför hans. Stefnan hefur verið sett á að safna þrjátíu þúsund dollurum eða rúmum 3,7 milljónum króna.

Fjölskyldan vill fá Kipsang heim til Kenía og jarða hann þar en það er mjög kostnaðarsamt.