Land­læknir vísar mál­flutningi Kalla Snæ á bug

Sagt var frá því í gær að Guðmundur Karl Snæbjörnsson, eða Kalli Snæ, hafi verið sviptur lækningaleyfi af landlækni í síðustu viku. Hann hefur krafist þess að sú ákvörðun verði endurmetin og meðal annars á þeim forsendum að um óeðlilega meðhöndlun væri að ræða.

Guðmundur Karl segir að hann hafi verið sviptur læknaleyfinu vegna alvarlegrar gagnrýni hans á heilbrigðisyfirvöld og sóttvarnaraðgerðir.

Sjá einnig: Landlæknir sviptir Kalla Snæ lækningaleyfi

Í yfirlýsingu embætti landlæknis segir að embættið hafi þá lagalegu skyldu að hafa eftirlit með rekstri heilbrigðisþjónustu. Í þeim tilvikum þar sem rekstur slíkrar þjónustu hafi ekki hlotið lögbundna staðfestingu landlæknis sé embættinu skylt samkvæmt lögum að bregðast við.

Samkvæmt lögunum hafi landlæknir heimild til að krefja heilbrigðisstarfsmenn, stofnanir og aðra sem veiti heilbrigðisþjónustu um upplýsingar og gögn sem embættið telur nauðsynleg til að sinna eftirlitshlutverkinu og þeim aðilum sé skylt að verða við slíkri kröfu.

„Embætti landlæknis vill árétta að umfjöllun, sem birst hefur í fjölmiðlum um framangreinda sviptingu starfsleyfis læknis, hefur enga stoð í þeim lagalegu forsendum sem lagðar voru til grundvallar í nefndu máli,“ segir í yfirlýsingu landlæknis.

Ekki stendur til að gefa út meira um þetta mál þar sem ákvörðun um sviptingu starfsleyfis heilbrigðisstarfsmanns sé ávallt kæranleg til heilbrigðisráðuneytisins.