Mynd­band við Þjóðhátíðar­lagið frum­sýnt á Vísi

„Þetta eru því skot frá raunverulegum upptökum,“ segir Marinó Geir Lilliendahl trommuleikari Stuðlabandsins. „Á milli blönduðum við saman skotum frá eldri Þjóðhátíðum sem tengjast stórum og miklum minningum hjá okkur. Þar má m.a. sjá Magga söngvara með konu sinni, brot frá okkur á stóra sviðinu og kafla frá brekkusöngnum í fyrra sem var stór í okkar sögu. Einhvern veginn er allt svo stórt og mikilfenglegt við Þjóðhátíð og við, eins og flestir landsmenn, eigum svo margar góðar minningar úr Herjólfsdal. Því fannst okkur þessi blanda einhvern veginn meika mest sens fyrir okkur og vildum ekkert flækja þetta of mikið.“

Það var Ásgeir Helgi Þrastarson sem tók upp brotin úr hljóðverinu en hann er kvikmyndatökumaður og ljósmyndari sem hefur fylgt sveitinni lengi. „Skotin frá Þjóðhátíðum koma svo frá Ásgeiri, Eiríki Hafdal, Jón from Iceland, Tuborg Tv og Senu Live.“

Stuðlabandið hefur komið fram á Þjóðhátíð allar götur síðan árið 2016. „Hátíðin er því orðinn stór partur af okkar starfsári og raunar hálfgerð uppskeruhátíð eftir langan vetur og langt sumar. Ætli það megi ekki segja að hún sé hápunktur ársins hjá bandinu.“

Meðlimir Stuðlabandsins byrjuðu snemma að semja lagið og eyddu síðan einni helgi í hljóðveri þar sem þeir tóku upp lagið, myndbandið og einnig efni fyrir heimildaþátt sem kemur út í sumar seinna. „Stuðlabandið framleiðir allt sem við kemur þessu verkefni,“ segir Marinó. „Við tökum upp lagið, útsetjum það og hljóðblöndum, klippum myndbandið og margt fleira. Þetta er mjög skemmtilegt ferli fyrir okkur sem hljómsveit og það er mikið bræðralag í gangi. Það má alveg sérstaklega nefna gítarleikarann okkar, Fannar Freyr Magnússon. Hann hefur farið fyrir framleiðsluferlinu með sinni ótrúlegu fagmennsku í hljóð- og myndvinnslu og leitt hljómsveitina áfram í þessu verkefni.“

Hann á ekki von á öðru en að myndbandið eigi eftir að vekja mikla lukku. „Við erum a.m.k. mjög ánægðir með það enda finnst okkar það kynna okkur vel og góðar minningar okkar frá Þjóðhátíð í Eyjum.“

Þótt Stuðlabandið hafi komið mörgum sinnum fram á Þjóðhátíð er mikil tilhlökkun í mannskapnum að sögn Marinós. „Tilhlökkunin er alltaf jafnmikil og við, eins og flestir tónlistarmenn sem koma þarna fram, lítum á hátíðina sem einhvers konar uppskeruhátíð okkar. Það jafnast fátt á við Herjólfsdal um verslunarmannahelgina enda er stemningin alltaf stórkostleg.“

Einnig má hlusta á lagið á Spotify.