Tíu sem gætu stolið senunni á HM 2026

Hér að neðan má sjá leikmennina tíu sem The Athletic valdi. Nokkur risa nöfn eru á listanum og svo nokkur minna þekkt.

Þrátt fyrir að verða nýorðinn 23 ára þegar HM 2026 hefst verður Bellingham á leið á sitt fjórða stórmót með Englandi. Hann var aðeins 17 ára og 349 daga gamall þegar hann varð yngsti leikmaður í sögunni til að spila á EM. Met sem Kacper Kozlowski og síðar Lamine Yamal hafa slegið.

Bellingham hefur verið eitt stærsta nafnið í heimsfótboltanum undanfarin misseri. Líkt og aðrir leikmenn Real Madríd átti hann ekki sitt besta ár á nýafstöðnu tímabili. Stóra spurningin er hvort Xabi Alonso, nýr þjálfari Real, nái að hrista upp í leikmannahópnum og hvort Thomas Tuchel, landsliðsþjálfari Englands, komi Bellingham í þær stöður sem gerðu hann að einum mest spennandi leikmanni heims.

Enn aðeins 17 ára og strax orðinn einn besti leikmaður heims. Var í lykilhlutverki þegar Spánn stóð uppi sem Evrópumeistari á síðasta ári, gæti hann gert slíkt hið sama á HM?

Yamal er einstakur leikmaður með einstaka hæfileika og ólíkt mörgum öðrum ungum leikmönnum þá virðist hann njóta sín hvað best þegar sem mest er undir. Það eru allar líkur á að hann bjóði upp á HM-listsýningu þegar að því kemur.

Hefur staðið sig frábærlega með Bayer Leverkusen og þýska landsliðinu undanfarin misseri. Svo vel raunar að Liverpool ætlar að gera hann að dýrasta leikmanni í sögu ensku úrvalsdeildarinnar.

Annað hvort munu vistaskiptin, og verðmiðinn, gera það að verkum að pressan verður of mikil og Wirtz nær ekki hæstu hæðum á komandi leiktíð. Eða þá að hann mun njóta sín í botn og mæta fullur sjálfstrausts á HM.

Ef Þýskaland fer langt á HM er svo gott sem öruggt að Wirtz verði prímusmótor velgengni liðsins.

Þó Mohamed Salah sé enn skærasta stjarna Egyptalands gæti hinn 26 ára Marmoush tekið af Salah sem besti leikmaður Egypta á HM. Hann gat vart byrjað betur á Englandi eftir að ganga til liðs við haltrandi lið Manchester City í janúarglugganum.

Marmoush hefur notið hverrar mínútu og ef lið Pep Gurdiola blandar sér af alvöru í titilbaráttu á næstu leiktíð má reikna með að Marmoush njóti sín enn betur.

Var orðaður við Manchester United en valdi sem betur París Saint-Germain eftir að hafa gert góða hluti með Benfica í heimalandinu. Neves er hinn alhliða miðjumaður og virðist geta leyst hvaða hlutverk sem er á miðri miðjunni.

Hann var síðasta púslið sem Luis Enrique vantaði í annars stórbrotið, og rándýrt, lið París Saint-Germian. Neves vann allt sem hann gat með PSG í vetur og hver veit nema liðið fullkomni gott tímabil með sigri á HM félagsliða.

Stóra spurningin er þá hvort Neves verði búinn að ná sér niður þegar HM fer fram á næsta ári eða þá hvort hann verði orðinn örmagna eftir strembin tvö tímabil. Hin stóra spurningin er svo hvort Cristiano Ronaldo verði enn fremstur hjá Portúgal og hvort liðið megi við því.

Annað undrabarn sem spilar fyrir París Saint Germain. Hefur aðeins spilað þrjá A-landsleiki sem stendur en verður að öllum líkindum kominn í stærra hlutverk að ári liðnu, skoraði vissulega tvennu í úrslitum Meistaradeildar Evrópu.

Með annarri eins frammistöðu á næstu leiktíð getur Didier Deschamps, þjálfari Frakklands, ekki annað en komið Doué fyrir í liðinu.

Nico Paz, Argentína

Tvítugur sóknarþenkjandi miðjumaður sem ólst upp hjá Real Madríd en skipti nokkuð óvænt til Como á Ítalíu á síðasta ári. Hefur verið líkt við Lionel Messi og hver veit nema hann sýni af hverju á HM 2026.

Andrey Santos, Brasilía

Einn af fjölmörgum leikmönnum sem hefur verið á mála hjá Chelsea á undanförnum árum. Var keyptur á ágætis upphæð frá Vasco da Gama í heimalandinu. Santos, sem er 21 árs í dag, var lánaður samstundis til Vasco en hefur þó verið á mála hjá Chelsea frá 2023 án þess að spila deildarleik.

Var lánaður til Nottingham Forest tímabilið 2023-24 en lék aðeins einn leik með liðinu. Fyrir síðasta tímabil var hann lánaður til Strasbourg, vinafélags Chelsea í Frakklandi. Þar hefur hann sprungið út og notið sín á miðri miðjunni. Virkilega duglegur miðjumaður sem getur skorað mörk.

Kenan Yıldız, Tyrkland

Þó flest allir muni benda á Arda Güler, leikmann Real Madríd, sem stærsta nafnið í tyrkneska liðinu. Yıldız – sem spilar í treyju númer 10 hjá Juventus – mun hins vegar vilja sýna öllum og ömmu þeirra að það er í raun hann sem er helsta vonarstjarna þjóðarinnar. Átti sinn þátt í að Tyrkir komust í 8-liða úrslit á EM 2024 og vill án efa bæta þann árangur á HM.

Johnny Cardoso, Bandaríkin

Baráttuglaður miðjumaður Real Betis á Spáni. Ætti að henta leikkerfi og leikstíl Mauricio Pochettino, þjálfara Bandaríkjanna, fullkomlega. Ef Bandaríkin ætla sér að gera eitthvað á heimavelli þá er ljóst að liðið mun þurfa að verjast vel og berjast um alla lausa bolta, þar kemur Cardoso inn.