Jón Þór hættur hjá ÍA

Jón Þór, sem er mikill Skagamaður, tók við þjálfun ÍA þann 1. febrúar 2022. Liðið náði afar góðum árangri á síðustu leiktíð og endaði í 5. sæti, eftir að hafa verið afar nálægt Evrópusæti, en er núna á botni Bestu deildarinnar.

Í tilkynningu segir að bæði Jón Þór og stjórn félagsins séuu sammála um að nú sé rétt að gera breytingar, með hagsmuni liðsins og framtíðaruppbyggingu að leiðarljósi.

„Ég vil þakka Knattspyrnufélagi ÍA fyrir samstarfið síðustu ár. Það hefur verið mér bæði lærdómsríkt og ánægjulegt að starfa með leikmönnum og starfsfólki félagsins. Ég óska liðinu og öllum sem að því koma góðs gengis í framtíðinni,“ segir Jón Þór í tilkynningu.

Stjórn KFÍA hefur hafið leit að arftaka Jóns Þórs.

Fór ekki leynt með áhyggjur sínar eftir tapið í Mosó

Síðasti leikur ÍA undir stjórn Jóns Þórs var 4-1 tapið gegn Aftureldingu í Mosfellsbæ í gær. Skagamenn eru neðstir með aðeins níu stig að loknum ellefu umferðum og var Jón Þór spurður eftir leik í gær hversu áhyggjufullur hann væri:

„Staðan er ekki góð, það er klárt.“ Aðspurður enn frekar hvort hann hefði áhyggjur af sinni stöðu svaraði hann:

„Að sjálfsögðu. Á meðan við komum okkur ekki í betri stöðu í töflunni þá hefur maður áhyggjur af því. En ég hef alltof margar aðrar áhyggjur til að pæla í því.

Það er alveg klárt að við þurfum að ná aðeins að endurstilla okkur og hrista af okkur, við erum alltof þungir í herðunum og það þarf alltof lítið að gerast til að liðið brotni eins og í restina. Þetta er aldrei 3-1/4-1 leikur en trekk í trekk finnum við okkur í þeirri stöðu og eigum viku eftir viku möguleika til að koma okkur í betri mál í deildinni en meðan við nýtum það ekki þá hefur maður áhyggjur af mörgum hlutum,“ sagði Jón Þór í gær.